01 de junio de 2014
01.06.2014

Nas orixes de Rosalía de Castro

A poetisa galega orixinaria de Padrón tivo antepasados nacidos no Concello da Estrada

01.06.2014 | 01:43

Actualmente en España os nenos adoitan levar o apelido do pai e da nai, mentres que en Portugal levan primeiro o da nai baseándose no principio do dereito Romano: mater semper certa est, pater incertus. Porén nos séculos XVI-XVII vemos que os varóns levaban habitualmente o apelido do pai e as mulleres o da nai, aínda que ás veces escollían o dos seus avós, e tamén era frecuente que unha persoa que deixaba unha herdanza importante esixira aos sucesores que levasen o seu apelido, caso dos Reimóndez-Figueroa, Leira-Castro, Vázquez-Sotelo, etc.

Non debe pois estrañarnos que no século XVI Julia de Castro, veciña de Santiago, fose filla de Juan Ballesteros Rubalcaba ou del Mazo (de onde era natural) e de Catalina Rodríguez de Ribera, posiblemente da familia dos Rodríguez de Castro de Preguecido.

Julia de Castro casou primeiro con Pedro Núñez e en segundas nupcias con Luís Bermúdez de Castro, da casa grande dos Bermúdez de Castro en San Paio de Figueroa, fillo de Juan González de Figueroa, señor de Callobre e de San Paio de Figueroa, familiar do Santo Oficio, e da súa muller Inés Álvarez Bermúdez, nacida no pazo de Gondar en Xeve.

Tanto Julia como Luis tiñan fillos do primeiro matrimonio, e así vemos que o 9 de agosto de 1595 Diego Bermúdez, fillo de dito Luís, di que "habiendo el dho Luis Bermudez ynbiado a Ana de Castro hixa de Julia de Castro su mujer al su lugar de la Puente Sarandón a coger y beneficiar el pan que tenía y en su compañía a Dominga das Carballas su criada [...] es venido a mi la noticia que Bartolomé Núñez vecino de dho lugar de la Puente de Sarandón [...] a la sobredha con una espada que llevaba en la mano le dio una gran herida en la cabeza muy peligrosa..." polo que pediu ao xuíz investigar dita agresión contra a criada.

Ana de Castro, a filla de Julia, casou en 1600 co boticario compostelán e home de negocios Benito Campelo, e foron eles os que fundaron a capela de San Bieito en Ponte Sarandón. Tiveron un fillo varón chamado Jacinto Campelo, e por fillas a Julia de Castro e María de Castro.

María de Castro, casou primeiro con Juan Gosende, fillo do capitán Alonso Gosende e de María Quinteiro (veciños de Cerdedo e ascendentes do P. Martín Sarmiento), con quen tivo tres fillos: Benito, Jacinto e Catalina. Logo María Castro casou con Andrés García de Seares, veciño e rexedor de Santiago e contador do Santo Oficio, tamén con fillos dun anterior matrimonio.

Cóntanos Andrés no seu testamento que "yo poseo las casas y granxas de la Retén donde vivo que he echo y edificado de nuebo durante el segundo matrimonio y las compre y adqueri el sitio a diferentes personas y en el tengo echo una capilla abocacion del espiritu santo que dejo fundada y dotada y señalada la dotacion en la dha casa y granxa y otros vienes" Tamén nos di que en dita casa tiña un escudo coas súas armas, pero non as describe, pero que vemos no segundo cuartel os roeis dos Castro e no cuarto, o xadrezado dos Bermúdez. E o 16 de decembro de 1655 o matrimonio fixo vínculo e fundación do pazo e capela de Arretén.

En 1651 Benito de Castro, o fillo de María, casou con Helena García de Seares, filla de Andrés, sendo os patróns do vínculo de Arretén fundado polos seus pais.

O seu sucesor, trala morte do primoxénito que faleceu na guerra en Amberes, foi o fillo segundo, Francisco Andrés que casou con Micaela Calderón del Castillo. Ao quedar esta media cega, en 1684 trasladáronse de Arretén a Padrón á casa de Travanca, fronte á ponte que dá a igrexa de Santiago de Padrón, na que puxo un escudo semellante ao de Arretén, pero poñendo as armas dos Castro e Bermúdez no 1º e 3º cuartel. Logo casou con con Catalina Sánchez Vaamonde de Luaces, de quen tivo en 1702 a Pablo Francisco de Castro de Seares, señor do pazo de Arretén, que casou con Josefa Salgado Moscoso, tendo por fillo a José de Castro Salgado que xunto coa súa muller Josefa Abadía Taboada foron os avós maternos de Rosalía de Castro, a nosa poetisa, quen no seu coñecido poema "Como chove miudiño" fálanos da casa nobre familiar, o pazo de Arretén, berce do seus devanceiros e propiedade dos seus avós pois alí "a miña nai foi nada".

Compartir en Twitter
Compartir en Facebook
selectividad 2018 Galicia

Toda la información sobre la selectividad

Consulta aquí toda la información sobre las pruebas de acceso a la Universidad: notas de corte, resultados y noticias


GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia