09 de mayo de 2014
09.05.2014
Faro de Vigo

"As top model son as princesas Disney da actualidade"

"O poemario é o diario da protagonista, porque ela medra e tén contradiccións"

09.05.2014 | 01:36
Antes da presentación en Vagalume, Negro visitou a alumnos do IES Pintor Colmeiro. // Bernabé/Gutier

CARLOS NEGRO - Autor de "Penúltimas tendencias"

A librería lalinense Vagalume foi onte o escenario de presentación de Penúltimas tendencias, a segunda incursión do escritor Carlos Negro na poesía para adolescentes. Se en Makinaria abordaba a obsesión dos mozos polo mundo do motor, nesta entrega fai unha crítica da imaxe sexy e fashion que se tenta inculcar ás mozas de hoxe en día.

-Vostede métese na pel dunha adolescente que non quere converterse nunha muller preocupada por estar sempre fermosa e ir á última moda. ¿É que nestes 40 anos non se avanzou nada na igualdade de xénero e síguese fomentando a muller sumisa e consumista?

-Aínda que si hai unha igualdade de xénero legal, seguen vixentes certos estereotipos, tanto físicos como de tipo vital. Nestes podemos incluir a presión que existe para que as nenas primeiro queiran ser princesas como as dos contos de Disney e, cando pasan á adolescencia, desexen ser top models. En realidade, as supermodelos son as princesas da actualidade. Pasa o mesmo cos estereotipos masculinos. A moda vende novos tipos de masculinidade, que en principio parecen positivos (como o coidado do corpo). Pero é que se manteñen actitudes, parellas a esta moda, na que se aposta polo macarra rebelde, depilado, pero que continúa sendo machista. Por poñer un caso, é o prototipo que ofrece Mario Casas na película Tres metros sobre el cielo.

-¿Resulta moi difícil para unha adolescente poder escapar desta presión e, por tanto, deixar de pertencer a un grupo?

-A adolescencia é sempre unha etapa de crise, e si que vai resultar complicado manterse á marxe dos centros comerciais. Pero tamén é difícil para un adulto. O poemario é tamén un diario da protagonista, porque ela medra e tén contradiccións.

-¿Os pais son conscientes desta imaxe que se tenta transmitir ás adolescentes?

-Non sei ata qué punto. En Vigo e A Coruña xa se organizan festas só para nenas, nas que as visten de princesas, lles fan a manicura e tratamentos de pel. Estas nenas desfilan así para os seus pais. Pero é que por un lado están este tipo de festas e, polo outro, a lacra dos malos tratos e o tipo do amor romántico no que teñen cabida os celos e a posesión. Desde os 4 anos e ata a adolescencia, a través de libros como os do italiano Federico Moccia, ou a través da publicidade, ás nenas véndeselles un estilo de vida ata idiomático, porque o inglés pasou de ser unha lingua a ser unha característica deste estilo de princesas, con termos xa tan cotiáns como chic ou fashion. Teño que dicir que se os pais teñen unha visión crítica desta situación, á adolescente seralle máis fácil non caer neste mundo.

-¿Foi difícil escribir a través dunha adolescente?

-Sempre é complicado meterse na pel dunha personaxe para escribir, pero nesta ocasión tiven que facer ademais laborais de observación e de investigación, lendo revistas para adolescentes como Superpop ou vendo series para este tipo de público.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia