18 de agosto de 2019
18.08.2019

O Concello tenta fomentar o uso do galego entre os nenos nos seus xogos e no deporte

O vindeiro martes van organizar unha actividade entre os cativos do campamento de verán municipal

18.08.2019 | 03:06

O Servizo de Normalización Lingüística municipal, dependente da concellería de Cultura, vai organizar en colaboración coa de Educación unha actividade de dinamización pensada para visibilizar e impulsar o uso da lingua galega no deporte e nos xogos entre os nenos da localidade.

Trátase de Lingua Forza 3, unha proposta que se vai ofrecer o vindeiro martes entre os rapaces do campamento de verán do Concello do Grove.

Neste obradoiro plantéxase "unha divertida xincana con probas e xogos populares en versión lingüística e novos xogos deseñados especialmente para este proxecto", de tal xeito que para superaren as distintas probas os nenos "terán que empregar as súas destrezas de traballo en equipo, resistencia, habilidade e velocidade física, lingüística e mental".

Do mesmo xeito, "os monitores irán enfiando todas as probas coa posta en escena de narracións dramatizadas, fomentando o uso da lingua galega entre a xente miúda dun xeito eminentemente lúdico a través do xogo e do traballo en equipo", explican no Concello.

Trátase de "promover os xogos en galego, tanto os tradicionais coma o máis novos, asociar o uso da lingua galega a outras áreas do currículo escolar, especialmente á educación física, e dar a coñecer o léxico do deporte e o patrimonio inmaterial do galego oral", engaden.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia