18 de mayo de 2018
18.05.2018

Ribadumia homenaxea á Agrupación Músico Cultural pola defensa do idioma

A entidade foi das primeiras da comarca en organizar un acto estable polo Día das Letras Galegas -A banda de Castrelo deu o seu tradicional concerto no Paseo da Calzada

18.05.2018 | 03:44

O Concello de Ribadumia celebrou onte por segundo ano a gala "Ribadumienses en prol do galego". O homenaxeado fai un ano fora o sacerdote Dositeo Valiñas, e onte as honras foron para a Agrupación Músico Cultural de Ribadumia. Esta entidade foi pioneira no municipio na organización de eventos co gallo do Día das Letras Galegas, e de feito organizou un festival con motivo desta celebración en maio de 1999, só seis meses despois da súa creación. Dende entón, celebrou sempre un festival das Letras Galegas, o primeiro domingo despois do 17 de maio. O deste ano será o vindeiro día 20 pola tarde.

A gala "Ribadumienses en prol do galego" está convocada polo Concello, e os homenaxeados escóllense mediante unha campaña de apoios sociais. Neste caso, foi sobre todo a asociación de veciños de Barrantes a que impulsou o nomeamento. Outro dos motivos do mesmo foi que a Agrupación editou sempre en galego os carteis e programas das súas actuacións, agás cando tocaban fóra de Galicia ou tiñan bandas doutras comunidades convidadas en Ribadumia.

No acto estiveron presentes membros das tres bandas da Agrupación: a xuvenil, a infantil, e a "peque", e ao remate do acto interpretaron o himno galego, ao que lle puxeron voz os membros dos grupos Madia Leva e Añoranza, que actuaron noutros momentos da gala.

A presidenta da Agrupación Músico Cultural, María José Rial, sinalou sobre a elección do galego que "somos unha asociación nacida en Galicia, sentímonos galegos e entendemos que hai que fomentar a cultura da nosa terra". No acto léronse tamén poemas da homenaxeada nas Letras Galegas, a escritora María Victoria Moreno.

Mentres, en Cambados, a banda de Castrelo ofreceu o seu tradicional concerto das Letras Galegas, esta vez no Paseo da Calzada, e pola tarde houbo outra actuación musical, esta de estilo pop, e na praza de Alfredo Brañas. A formación política Somos Cambados, pola súa banda, proxectou un documental sobre María Victoria Moreno e fixo unha ofrenda floral a Cabanillas.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia


Enlaces recomendados: Premios Cine