A Illa, coincidindo co festexo do Día das letras galegas, donou ao colexio Torre un lote de 36 libros da vida e da obra da autora á que se lle adica este ano a efemérides, María Victoria Moreno. As obras entregadas son 12 exemplares de "Mar Adiante", outros 12 "Eu canto, ti contas" e a mesma cantidade dunha biografía de María Victoria Moreno escrita pola autora Fina Casalderrey. Todos os volumes pasarán a formar parte dos fondos da biblioteca do colexio, onde os nenos poderán consultalos. Ademais, toda a comunidade escolar está convidada a participar nun acto con Fina Casalderrey o vindeiro día 31.
"As Letras no Mar" porán fin ás actividades desenvolvidas para conmemorar esta data. Eses actos desenvolveranse mañá no peirao do Xufre, onde a asociación cultural e deportiva Dorna volverá coas súas embarcacións ao mar, en especial, coa xeiteira "Nova Marina", xérmolo da recuperación das tradicións mariñeiras.
