Culturgal citará en Pontevedra a 750 artistas en 225 actividades

Pontevedra prepárase para acoller a XVIII edición da feira das industrias culturais, Culturgal, que entre o 28 ao 30 novembro citará no Pazo da Cultura a 750 artistas e creadores en 225 espectáculos e actividades. Pola súa banda, o Culturgal expandido chegará este ano a Ribeira.

«A cultura é algo no que todos podemos estar dacordo, debe ser entretida e útil», manifestou Camilo Franco, director da feira, na presentación da edición deste ano, na que colaboran a Xunta de Galicia, as deputacións de Pontevedra e A Coruña e o Concello de Pontevedra. A cita cultural conta cun orzamento de 320.000 euros e, por primeira vez, cunha aportación directa do Ministerio de Cultura, de 30.000 euros.

Música, audiovisual, videoxogos, literatura, cómic, teatro, arte, xornalismo... estarán presentes durante os tres días con propostas para todos os públicos.

Neste sentido, Camilo Franco salientou que unha das apostas máis importantes é a de favorecer a creación de lectores.

A música terá un protagonismo especial no Culturgal e unha das novidades será o concerto de benvida do xoves 27 ás 21.00 horas no Auditorio do Pazo da Cultura, con Uxía Senlle presentando con varias artistas convidadas o seu último traballo, «Será por Flores».