Marín, de novo escenario da final autonómica de freestyle

A cultura e a improvisación urbana volverán ter unha cita imperdible esta fin de semana en Marín, coa celebración da final autonómica de freestyle na Finca de Briz a partir das 17.00 horas, que foi presentada onte no Concello por parte dos organizadores de BhB Galicia e o concelleiro Hugo González.

É a segunda vez que Marín acolle unha final a nivel galego desta disciplina artística. Participarán os oito clasificados nas dúas fases previas que se celebraron en Vigo e na Coruña, aos que se suman tamén Jota e Sozat, gañadores da final autonómica o pasado ano.

Aqueles que resulten vencedores nas batallas do sábado, clasificaranse de novo para a General Rap de Alicante, que se celebra en agosto, e para os que o Concello subvencionará a viaxe ata a cidade e a estancia durante a competición estatal. Ademais, esta final puntuará para o ránking de acceso ao FMS España.