Esta semana dará comezo unha das actividades estrela do programa Verbas en Flor, unha iniciativa que vive a súa primeira edición en Poio e que, impulsada desde a Concellería de Cultura, ofrecerá ata ben entrado o mes de xuño un gran número de citas no eido da arte, literatura, memoria histórica, tradición e música. Precisamente, estes dous últimos elementos serán os protagonistas das sesións Os nosos instrumentos. Trátase dunha serie de obradoiros que se desenvolverán entre este xoves 7 e o vindeiro 25 de maio e pensados para o alumnado de Educación Infantil e de Primaria. A concelleira de Cultura e Educación, Raquel Rodríguez, deu a coñecer onte os detalles desta actividade, acompañada por Nelson Quinteiro, de Máis Cantos, e o presidente da Escola de Acordeóns de Campelo, Juan José Mariño, encargados de impartir estes obradoiros. O CEIP Viñas e o de Lourido serán os primeiros en estrear esta nova iniciativa impulsada desde a Concellería de Cultura e Educación. Posteriormente, o obradoiro trasladarase aos CEIPs de Chancelas, Isidora Riestra e Espedregada.
