Camilo Nogueira presenta o ensaio "Unha nación no mundo. A razón resistente"

O histórico dirixente do nacionalismo galego Camilo Nogueira presentará mañá en Pontevedra o seu novo ensaio, "Unha nación no mundo. A razón resistente (1480-2010)". O acto celebrarase na Casa as Campás a partires das 20 e acompañará ao autor o editor e mestre Manuel Bragado.

O Ateneo de Pontevedra, organizador da presentación avanza que o ensaio principia co tempo anterior a 1810, ano en que se produce a liberación da sociedade das tropas napoleónicas e que ocupa a primeira parte da obra, titulada "Galiza no Absolutismo".

A segunda, "A nación política contemporánea", céntrase no acontecido entre 1810 e 2010. Para o autor, "malia ter padecido no Antigo Réxime unha dominación perversa", suliñan dende o Ateneo", Galiza mantivo os seus recursos vitais e a personalidade diferenciada".

Proba delo é que á altura de 1800 contaba coa capacidade precisa para participar nas transformacións da Revolución Industrial. Era o país máis populoso entre os da Península e das Illas.

"No tempo contemporáneo o Estado español negou a identidade histórica e cultural do país; eliminou a Xunta do Reino; forzou unha emigración dramática e marxinou as actividades económicas do país, provocando unha gravísima caída demográfica".

Malia todo, engaden, manifestando a "fortaleza dunha sociedade asaltada", en canto caeu a ditadura franquista e participou na UE, a sociedade galega respirou. "Pendente a superación do grave problema demográfico, conta cunha economía desenvolvida e particularmente exportadora. Nación pola historia, o vigor económico e social e a extensión universal da lingua propia, partillada con múltiples países, é quen de asumir o autogoberno como nación".