Tódalas artes no Día das Letras

A "Exposición das Letras Galegas", organizada pola Asociación Queremos Galego Marín, servíu de limiar á celebración do Día das Letras Galegas nesta vila. A mostra, que se expón no Museo Municipal, está integrada por 37 ilustracións elaboradas polo debuxante cuntiense Héitor Picallo, nas que caricaturiza a todos os autores homenaxeados no Día das Letras Galegas. Esta mostra poderá visitarse no horario do Museo Manuel Torres até o venres 23 de maio.

As caricaturas dos escritores homenaxeados no Día das Letras Galegas, desde Rosalía de Castro até Xosé María Diaz Castro, están feitas con recortes de xornais en galego, tintas chinesas, teas de tapizar, cortiza de sobreira, madeira de castiñeiro, madeira de cedro e, sobre todo, acuarela e augatinta.

Tamén onte presentouse neste espazo o novo libro do propio Héitor Picallo, "Coa lingua na terra". Publicada pola editorial Toxosoutos e prologada por Xosé María Lema Suárez, esta obra é unha escolma de artigos publicados en distintos medios de comunicación e na páxina web da Plataforma Prolingua e, xunto con outros textos inéditos, amosan o compromiso do autor coa defensa da lingua e cultura galegas. O libro inclúe, ademais dos artigos, outros retratos de escritores e autores admirados por Picallo, feito que o converten nunha obra singular.

Ateneo

Dentro dos actos previos á festa que hoxe se celebra, o Ateneo de Marín entregou os premios do XIX Concurso de Narracións Curtas. Os gañadores foron, na Categoría A, Joel Viñas González, Candela Santiago Bermúdez e Naomi Pousada Alias, os tres do colexio A Inmaculada. Na Categoría B os premiados son Elena Garnelo González, Iris, e Iván Lourido López, dos colexios Sagrado Corazón e A Inmaculada. Os galardonados da Categoría C son Nerea Dopazo Dalmau, Katherine Rossmery Yapurasi Romero e Nerea Fariña Sánchez (da Inmaculada as tres) e, por último, na categoría D, as vencedoras foron Marta Area Pesqueira, Jorge López Otero e María Fonseca García, tamén da Inmaculada nos tres casos.

Hoxe

O salón de actos do Museo Manuel Torres acolle hoxe, ás 12.30 horas, a entrega do XIII Premio de Narracións Curtas Concello de Marín, nas categorías de adultos e escolares, que organiza a Concellería de Cultura.