O barrio da Cuña celebra a III edición da Festa da Cunheira

O barrio da Cuña, na Mariñamansa, encheuse este sábado de alborada, viandas e música para celebrar un dos días máis grandes do ano coa celebración da súa festa da Cunheira. Organizada polo asociación cultural homónima, esta é xa a terceira edición consecutiva dunha troula dende o barrio, para o barrio.

A festa da Cunheira recupera a vida de barrio

Como conta un dos fundadores, a asociación cultural naceu hai uns anos "dun grupo de amigos de moitas xeracións", que comezou como peña ourensanista de fútbol de veteráns e máis tarde sumou unha vertente de asociación musical. O barrio perdera a súa festa anual cando os máis experimentados do grupo eran mozos, e coa súa bagaxe cultural, decidiron reanimar as celebracións para facer comunidade.

Xa cun torneo tradicional de chave a modo de previa un mes antes, as actividades comezaron co seu debido pasarrúas, para logo pasar ás actuacións de fin de curso dos grupos da asociación cultural, que ensina gaita, pandeireta e baile galego. Non podía faltar o xantar popular antes de seguir coa foliada, e chegar ao momento estrela do día, a Baixada da Marela: "Decidimos facer a festa de día na zona alta do barrio, e os concertos na zona baixa, e para facer esa transición quixemos facer unha ruada co carro do estilo das que se fan en Entroido", comenta un dos creadores da idea". Os concertos da noite alongáronse ata as 2.00 horas, co músico verinés Pappaquino como cabeza de cartel.