As termas romanas de Bande, escenario dunha longametraxe galego-portuguesa

O complexo arqueolóxico Aquis Querquennis, no concello ourensán de Bande, é o escenario principal da coprodución galego-portuguesa ‘Onte á noite conquistei Tebas’, o debut de Gabriel Azorín na dirección de longametraxes. A Xunta apoia esta película a través das axudas para produción audiovisual e para o desenvolvemento previo do proxecto. En Bande traballa desde finais de setembro o equipo do filme, encabezado por Filmika Galaika. Este xoves, visitou o equipo o conselleiro de Cultura, José López Campos, durante unha xornada de gravación de secuencias no campamento romano.

O responsable de Cultura, que estivo acompañado polo director da Axencia Galega das Industrias Culturais, Jacobo Sutil, e tamén pola alcaldesa de Bande, Sandra Quintas, felicitou o director do filme e a súa produtora executiva, Beli Martínez. Campos subliñou que se trata dunha das sete filmacións de proxectos subvencionados pola Xunta, que se desenvolven neste segundo semestre en diferentes localizacións galegas.

‘Onte á noite conquistei Tebas’ recibiu máis de 255.000 euros a través da convocatoria para a produción e coprodución de proxectos audiovisuais galegos, ademais de recibir previamente 20.000 euros para o proceso de preprodución.

A amizade é o tema central da primeira longa de Gabriel Azorín, quen conta cun reparto e un equipo internacional para rodar en galego, portugués e latín dúas historias separadas por máis de 2000 anos: a de dous rapaces portugueses dun pobo da serra do Gêres que van pasar a tarde ás termas de Bande, e a de dous dos soldados romanos que as construíron.