Cinco autores ourensáns poderán desfrutar dunha residencia literaria no exterior grazas ás bolsas concedidas pola Deputación de Ourense. A iniciativa está xestionada pola Residencia Literaria 1863 e permitirá ós autores ourensáns seleccionados desenvolver a súa creatividade en estadías, este verán, en Croacia, Islandia, Turquía, Polonia ou Andalucía. As residencias foron adxudicadas baixo o modelo de concorrencia competitiva ós ourensáns Arancha Nogueira, Iria Piñeiro, Cándido Paniagua, Rochi Nóvoa e Alexandre Corbillón.

O comité de avaliación estivo formado por Chus Pato, Luís González Tosar e Xosé Benito Reza, actuando de secretaria, con voz pero sen voto, a directora da Residencia Literaria 1863, Yolanda Castaño, que participou por videconferencia.

O vicepresidente segundo da Deputación, César Fernández, resalta a aposta do goberno provincial pola cultura a través de iniciativas como esta, que busca “poñer en valor a creatividade dos ourensáns”.

O comité de avaliación, que se reuniu onte no centro cultural Marcos Valcárcel, decidiu outorgar bolsas capaces de afianzar traxectorias xa consolidadas, dar impulsos definitivos a outras en camiño e ofrecer unha valiosa oportunidade a un autor novel, valorando a diversidade e calidade das propostas.

Os creadores seleccionados son a ourensá Arancha Nogueira, que viaxará a Croacia cun proxecto a cabalo entre o ensaio e a novela de autoficción; a poeta e actriz ourensá Iria Piñeiro, gañadora de dous Premios María Casares, que pasará a segunda quincena de xullo en Mojácar; o narrador e profesor de Xinzo de Limia Cándido Paniagua, que desenvolverá en Turquía o seu proxecto de novela; a mestra e escritora de Sobradelo (Xunqueira de Ambía) Rochi Nóvoa, que se afanará en Polonia nunha proposta de obradoiro de creación literaria orientado á rapazada; e o novísimo poeta de Celanova Alexandre Corbillón, de 18 anos, que terá a oportunidade de traballar en Islandia no que será o seu segundo poemario.

César Fernández valora a importancia de “levar adiante esta iniciativa, que busca poñer en valor a creatividade da nosa provincia”. O vicepresidente primeiro da Deputación reivindica a “potente aposta” do goberno provincial pola cultura, con iniciativas como esta, “unha oportunidade para que estes cinco creadores poidan levar adiante unha residencia literaria nun contexto diferente ó seu cotián”.

Segundo resalta Yolanda Castaño, os beneficiados das bolsas “poderán gozar de estadías creativas no estranxeiro tan capaces de contribuír á súa obra literaria como de incrementar os seus perfís internacionais, concentrándose dende contornos plenamente orientados á inspiración e o estímulo creativo nunhas condicións de excelencia”.

Segundo decidiu o comité de avaliación, na Fundación czAR(T) Krzywogonca, situada no norte Polonia, estará Rochi Nóvoa e no suroeste de Islandia –Centro para a Creatividade Gullkistan–, poderá desfrutar da estadía literaria Alexandre Corbillón. Pola súa banda, Arancha Nogueira desfrutará da Residencia Marko Marulic da Asociación Kurs, en Split, e Cándido Paniagua visitará a Casa dos Escritores de Nilüfer, situada en Turquía.

Este proxecto ofrecerá tamén a Iria Piñeiro a oportunidade de desfrutar durante a segunda metade do mes de xullo dunha estadía de quince días na Fundación Valparaíso, nas aforas de Mojácar (Almería).

Estas bolsas, foron adxudicadas baixo o modelo de concorrencia competitiva a estes cinco creadores ourensáns, que achegaron unha memoria do proxecto que se quere desenvolver, un currículo, unha mostra dos traballos anteriores e unha carta de motivación. O obxectivo desta iniciativa é fomentar a creación literaria e o perfil internacional dos autores da provincia.