Efímeras

Cando o bo de Edison deu en idear a bombilla fíxoo ca idea de que durase. Que durase unhas 1.500 horas, hora menos, hora máis. O inxenio levou ós fabricantes a inventar bombillas que perdurasen unhas 100.000 horas. Naturalmente isto alporizou ós comerciantes. Tanta eficiencia rachaba o mercado. E deste xeito fixouse a vida dunha bombilla nunhas 1.000 horas, e todos contentos.

Nun parque de bombeiros de California pódese ollar unha bombilla que leva alumeando dende 1901. Xa vai para 110 aniños. É a bombilla de Livermore. O seu inventor, Chaillet, levouse o segredo da patente á tumba. Non era rendable para a economía mundial. Nos cuarenta inventáronse unhas medias de nailon que non se podían rachar. Loxicamente sairon do mercado.

Para casos raros o que lle ocorre a algunhas impresoras. Teñen un chip de fábrica que limita a súa vida. A impresora manda un sinal de morte súbita ó ordenador . E o famoso ipod tampouco se queda atrás. As súas baterías de litio teñen a vida acurtada de fábrica.

Todo isto lembra un pouco ás efímeras. As efímeras son insectos acuáticos nos que a súa vida adulta dura unhas horas. Unhas horas revoloteando sobre a auga na percura de parella.

Coma efímeras, gran parte dos nosos aparellos están deseñados para gozar dunha curta e fascinante vida útil. Cousas do mercado...