Vigo, a mellor do mundo

A calquera que siga a política municipal desde hai un tempo soaralle esta frase enchida de orgullo: «Sodes os mellores do mundo!». Ese «os mellores do mundo» está en todos os discursos do alcalde, Abel Caballero, xa sexa nunha visita a un colexio ou nunha conferencia ante industriais do metal. A mellor ría do mundo, as mellores empresas do mundo, o mellor Nadal do mundo —desta non me podía esquecer—, a mellor cidade do mundo, o mellor estadio de fútbol do mundo (o do noso Celtiña)... Esaxera, non digo que non. Pero deixando a un lado a estratexia de márketing, o show... e se non esaxera tanto?

No ámbito económico hai exemplos dabondo do que representa ser líderes mundiais en sectores moi competitivos. Stellantis Vigo, a Citroën de toda a vida, é a mellor planta do mundo do seu grupo, tanto en volume de produción coma en eficiencia, como ben recolleu esta semana o que máis sabe de automoción no FARO (o segundo son eu), Adrián Amoedo. Os nosos estaleiros constrúen navíos de última xeración para armadores dos cinco continentes e son a envexa doutros países: oceanográficos, iates de luxo, pesqueiros como o que acaba de asinar Profand... e imos estrearnos en buques de apoio para a eólica mariña.

Aquí ao lado temos o maior fabricante mundial de carragenina, unha molécula que se extrae das algas e se usa para darlle textura aos alimentos, por exemplo, aos iogures: Ceamsa. Tamén está o grupo líder en micobacterias, vacinas para animais e, máis pronto que tarde, tamén para humanos: Zendal. Na pesca non temos rivais, con firmas tan potentes e coñecidas como Nueva Pescanova, Profand, Wofco, Iberconsa, Pereira, Pescapuerta, Mascato... Incluso nunha derivada tecnolóxica, con Marine Instruments, o maior fabricante mundial de boias satelitais para a pesca do atún, e que tamén é referente en vehículos mariños non tripulados; ou Hermasa, líder en maquinaria para conserveiras.

Stellantis Vigo suma dos años seguidos como la más eficiente de todo el grupo

Ata no ceo atopamos casos de éxito, algúns que veñen de lonxe, como Delta Vigo, a maior empresa do sector aeronáutico de Galicia, e outros de novo cuño, como Alén Space ou URX Space, que participa no primeiro proxecto de agricultura espacial e está na órbita —nunca mellor dito— da NASA. Máis exemplos de liderado mundial? GKN Vigo, BorgWarner, CITIC Censa, Setga, Recalvi... Tamén temos o primeiro porto de contedores do Arco Atlántico, o segundo de automoción de España e o primeiro de Europa —e atrévome a dicir que do mundo— en pesca.

E fóra da economía? Somos a cidade coa mellor calidade de vida do país segundo a OCU, a urbe máis feliz de España segundo o Institute of Quality of Life, a que ten o mellor nivel de inglés segundo o informe anual de Education First, un dos mellores destinos turísticos do mundo para The Telegraph... e xa non entro no tema das Cíes e as súas praias e riqueza natural nin, moito menos, no Nadal, porque non fai falta lembrarllo a ninguén.

E se ao final vai resultar que Caballero non esaxera tanto? Que Vigo é, efectivamente, a mellor do mundo en máis dun sentido? O show pode ser excesivo, a retórica hiperbólica, pero a realidade é teimuda: lideramos en sectores estratéxicos, innovamos, exportamos talento e seguimos apañando récords. Quizais, en vez de sorrir con escepticismo cada vez que o escoitamos dicilo, deberiamos empezar a crelo un pouco máis.