Opinión

Saudades do Professor António Rifón

Há poucos dias a Faculdade de Filologia da Universidade de Vigo comemorou o ‘XXV aniversário’ da sua criaçom e organizou umha homenagem póstuma ao inesquecível Professor Doutor António Rifón, falecido em 2022. Conhecemos este jovem investigador no verao do ano 1993 na morada do Professor Pena, que por circunstâncias da vida fora um dos nossos excelentes alunos na Faculdade de Filosofia e Letras da Universidade de Santiago no curso académico 1966-67. Antom ultimava temas relacionados com a sua tese de doutoramento (defendida no ano 1994) e a autora deste artigo coordenava dúvidas sobre o projeto de investigaçom intitulado “La sufijación homogénea en español”, que defenderia nos próximos meses perante o júri que julgaria o concurso-oposiçom à cátedra de Filologia Espanhola da Universidade de Vigo.

Nesses momentos consideramos importante no departamento incorporar este extraordinário investigador como docente à Universidade de Vigo. Projetamos começar a editar livros como “Estudios de Morfologia” (1996) com trabalhos dos especialistas Jens Lüdtke, Antonio López Eire, Luisa Blanco, M. J. Marçalo, António Rifón (estudou as pautas semânticas de formaçom de verbos parassintéticos) e a autora deste artigo (analisou os apreciativos nas ‘Cantigas de Santa Maria’). Antom sempre foi um colaborador leal, nobre, muito trabalhador, eficaz, um docente muito apreciado e bem qualificado polos seus alunos.

A Morfologia suscita debates enriquecedores, nomeadamente com determinados sufixos como é o caso do sufixo do galego-português ‘-oiro,a’ e ‘doiro’ ou ‘-ouro,a’ e ‘douro’, que pode expressar a noçom de ‘o local onde se passa a açom expressa polo verbo’ (assi, ancoradoiro, embarcadoiro ‘local de embarque’, lavadoiro, miradoiro, suadoiro ‘lugar onde se sua’ ou ‘pano que se coloca sobre o dorso da cavalgadura sobre o qual assenta a sela’...). Está presente em topónimos da Galiza (Lendoiro, Reboiro,Vendoiro, Vidoiro...).

O livro-homenagem póstuma recolhe umha bibliografia e quinze artigos deste Professor Titular da nossa Universidade, prologados por diferentes investigadores. Lamentamos que nom nos tivessem convidado para nos juntarmos a esta homenagem, embora tenhamos participado em quase todos os “Encontros de Morfólogos”: “I Encuentro de morfología, investigación y docencia” (Univ. de Jaén), II (Univ. de Extremadura), III (Univ. de Murcia), IV (Univ. de Zaragoza), V (Univ. Complutense), VI (Univ. de Vigo), VII (Univ. de Girona), IX (Univ. de Cádiz), XII (Univ. de Santiago)...

Jesús e António estarám “Descansando em Paz” no Além, mas na Galiza sempre ficarám os seus excelentes estudos, e serám lembrados pola sua bondade e generosidade, por estes motivos temos saudades. Às famílias transmitimos mais umha vez as nossas condolências, mas devem estar orgulhosas, porque estes dous morfólogos sempre as quererám e ajudarám desde o Além.

*Professora Catedrática de Universidade

Suscríbete para seguir leyendo

Tracking Pixel Contents