Pola prensa, imos sendo sabedores de acontecementos que se producen nos territorios de Turonio, ou sexa o país antigo e actual que limita ao Norte coa ría de Vigo e ao Sul co Miño. Polo mar, a seguinte terra é Nova Inglaterra, ou sexa os máis antigos EEUU, nos que entra Nova York. Ao Leste, Turonio carece de marcas precisas. Uns fan chegar Turonio a Ribadavia e outros queren que se deteña no Suído. Todo intento de incluír o Morrazo en Turonio será van e todo propósito de lle dar outro nome ao hinterland de Vigo terminará coroado polo fracaso.
En Turonio, pois, áchase Redondela, e a vila e concello que leva tan ilustre nome venera como peixe identitario o berete. Lemos que ven de construír, na vella estrada da Encarnación, un roundabout novo, que recibirá o nome do berete. Aquí facemos votos porque non lle digan oficialmente "rotonda" nin moito menos "glorieta". Esta derradeira é voz enxebre madrileña. Glorietas de Bilbao, de Ruiz-Giménez, de Quevedo, da nosa mocedade! Nada teñen que ver estas "glorietas" nin con Redondela nin coa Terra e Condado de Turonio. Polo tanto a nomenclatura pública de Redondela, neste e máis casos, e tamén a doutros concellos, debe ir á denominación do roundabout que o pobo galego discurriu na práctica diaria: REDONDA. Tamén redonda foi adoptada no Bierzo, digo por apoiar a proposta. Berete é un dos nomes galego vulgares que leva a especie de peixe que no ano 1758 o fundador da taxonomía zoolóxica, Linneo, carimbou para sempre como Aspritigla cuculos. O de berete debe de provir de Gasconha, que é a costa atlántica de Occitania, moi mariñeira. En galego, esta especie é tamén coñecida coma rubio, escacho, escarabillón. E doutros modos e maneiras.
Nós apoiamos, con toda a nosa simpatía, a decisión dos redondeláns. Eles queren facer do peixe berete un signo patrimonial. Tiñan xa o choco, pero parece que lles sabe a pouco. Coloquen, se queren, un berete no escudo municipal. Pero, polos cravos de Cristo, non mesturen o berete coas "glorietas" do Madrid mesocrático do século traspasado. Ademais, que é Redondela senón unha redonda nun diminutivo en función afectuosa?
