Para pasarnos desapercibidos, un día rexistramos como "Asociación Cultural" de Vigo unha entidade legal de carácter antifranquista e nacionalista galega. Fixeron o propio en Cataluña ao fundaren o "Omnium Cultural", con máis medios e apoios económicos ca nós. Tanto a viguesa coma a barceloní levaban, fronte á represión, nomes neutros ou aparentemente insignificantes. Nós viamos o Omnium con envexa san. Eles tiñan cotizantes e estaban a levantar unha fronte cultural con forza. A nós sobrabannos as ideas e o vigor e a disciplina, na Asociación Cultural de Vigo.
O Omnium dispuña de recursos, os cales estaban moi ben administrados. O Omnium instalouse nun vello palacio da Barcelona histórica. Nós en López de Neira. De seguida coordinou o Omnium as agrupacións catalanistas que subreviviran á ocupación, á represión da identidade e á liquidación do Estatuto; operación na que se incluíu o fusilamento de Lluís Companys (aquel president que foi leal á República Española e que protexeu a Castelao). En 1962 o Omnium catalán levou adiante a campaña "de la Lingua", con sumo éxito. Foi entón cando o abade de Montserrat, Aureli M. Escarré, fixo as súas vigorosas declaracións democráticas e nacionalistas a Le Monde.
Fraga Iribarne, ministro de Información da España Negra, desencadeou unha ofensiva de odio anticatalán, e o abade foi obrigado a escoller o camiño do exilio político. Multaron os conferenciantes en catalán e proibiu Fraga o "Festival de la Canço" que ía celebrarse en Vilanova i La Geltrú. O Ministerio de Fraga ilegalizou o Omnium Cultural e incautou a súa documentación e os seus fondos económicos. Pouco despois, o 22 de nadal de 1962, a sede dos "Minyons de la Muntanya", ou sexa dos scouts católicos de Cataluña, era incendiada por axentes do goberno de Franco.
Estes días chega a nós a noticia de que o actual presidente do Omnium Cultural, por orde dunha xuíza de apelido Lamela, ingresou en prisión. E isto ocorreu poucos días despois do aniversario do fusilamento en Montjuic de Companys, quen fora detido pola Gestapo en Francia e entregado a Franco para o seu sacrificio. Omnium, en Latín, significa algo que a xuíz Lamela coido que ignora.