Día da Patrona da Guardia Civil, Virxe do Pilar á súa vez Patrona de España. Día da Raza. Día da Hispanidad. Día, a penas de España. Ou sexa: demasiados días e padroados confundidos. En todo caso o pasado 12 de outono foi unha ocasión perdida para Raxoi pedirlle aos EE UU a libertade de Óscar López Rivero, preso nos EE UU por defender valores da Hispanidad como son a permanencia da cultura de espresión castelá en Puerto Rico. Ocasión perdida foi o 12 para lle esixir ao sultán de Marrocos a libertade do pobo árabe saharaui que mantén, con teimosía e lealtade, a lingua castelá no seu captiverio interminábel. Pero en Madrid ninguén sabe que foi feito do Instituto de Cultura Hispánica que tan disparatada como xenialmente decorara Urbano Lugrís.
Agora as queixas, e ben amargues, son para En Maré e os seus socios, que non apareceron no desfile de Madrid para lle aplaudir a unha Legión máis ben engordada, diminuida e pouco veloz. Que Hispanidade propugna este réxime que mandou un embaixador de España en Viena a faltarlle ao respecto ao presidente Evo Morales, que é o indio aymara que proclamou en Bolivia a república plurinacional? A Hispanidade foi morrendo cos paus que lle daban, non En Maré, non Cataluña, non Otegi, senón os colegas do rexime vixente en España. A Hispanidad quedou ferida de morte o día no que o rei vello ("que Deus confonda", dicía o trovador medieval) lle puxo ma cara a Chávez e lle chantou a frase inmortal: "Por qué no te callas?". Máis tarde ocorreu o episodio dos elefantes, pero o seu escenario foi África. Ou sexa, o continente no que España deixou ir Guinea Ecuatorial aos brazos amantes da Francofonía, a poder de insultar o seu goberno a prensa de Madrid cada vez que se refere á antiga colonia. Tamén quedou ferida de morte a Hispanidad o día en que Aznar póndose nos bicos dos peíños, deixou asomar o chavello "agote" da súa estirpe e lle pediu, nada menos que a Fidel Castro, que fixese as malas. Exactamente a impertinencia foi esta: ¡A ver si mueves ficha!.
Lembran cando Franco, que acreditaba na Hispanidad, destituiu o embaixador de España, Lojemdio, por este lle faltar ao respecto a Fidel Castro? Francia, Inglaterra, Portugal, tecen con primor, e con astucias infinitas, a tea das súas antigas colonias. Os españoles, ou españois, esqueceron que os EE UU ocupan indebidamente territorio deles en Guantánamo, onde conculcan todos os días os dereitos humanos máis elementais. O goberno español intervén na política interior de Venezuela e apoia os que conspiran alí contra a legalidade democrática vixente.
En Vigo existen, aínda que modestas, estatuas a San Martín, a Bolívar, a Martí, pero encóntranse balorentas e suxas la de Martí máis?. A rúas que levan os nomes das repúblicas hispanoamericanas en Vigo son sentidas pola poboación como valeiras de afinidade histórica. Non se extrañe ninguén de que a esquerda realmente existente no Estado Español e En Maré quixesen, esta vez, honorar a memoria da Xeración do 98 e lle desen un bon plante ao desfile e ao festexo do 12 de outono.
