Faro de Vigo

Faro de Vigo

Contenido exclusivo para suscriptores digitales

dende o meu sofá

A verdade pode non ser

Qui est veritas? (Que é a verdade?) preguntou sen reviravoltas Pilatos a Xesús de Nazaret pouco antes de envialo á morte a pesar de non atopar culpa nel.

E qui est veritas continúa sendo a pregunta que cada día brota no corazón como consecuencia do pulo que a propia natureza impón en toda persoa.

Qui est veritas pensamos e respondemos; ou simplemente tentamos facelo.

Qui est veritas repítome en cada hora convencido de que me pasarei a vida sendo o simple aprendiz dunha posible resposta. Porque sei que á verdade nunca poderei "posuíla do todo" nin tampouco conquistala; no mellor dos casos poderei deixarme ser posuído e conquistado por ela, pero só iso.

Qui est veritas resoa no meu interior convencido de que nunca será esa arma que usamos con frecuencia co manido prólogo de "mira, vouche dicir a verdade".

Qui est veritas seguro de que a verdade, a verdade verdadeira, ten que doer a quen a di pero nunca pode facer dano ao que a escoita.

Qui est veritas e déixome interrogar sabendo que a verdade nunca será o resumo desas "verdades" miñas (e só miñas) que utilizo como pedra arreboladizas contra o outro. Porque a verdade que se acompaña do pracer de facer dano non será verdade por moita volta que se lle queira dar; nunca.

Qui est veritas coa dor de topar a algúns que se teñen enrochado no que cren que é a verdade e que, tras confundila coas súas propias ideas, tentan impoñela a punta de espada ou de lingua.

Qui est veritas lembrando o que dixo Tomás de Aquino: o que se debe facer débese facer; pero acompañado sempre desa virtude chamada prudencia que axuda a atopar o mellor modo de facelo. Porque a maior parte dos problemas entre os habitantes deste planeta non son producidos por discrepar en ideas fundamentais, senón polo "modo" en que alguén quere impoñelas ou realizalas; pola forma belicosa ou insidiosa en que se formulan ou, en tantos casos, por tratar de levalas á práctica antes (ou despois) de tempo.

Non quero esa verdade que paire odio coa dureza dun diamante e a frialdade do inferno. Non.

Qui est veritas entendendo que hai algo por riba dela que se chama amor.

E qui est veritas evocando os versos de Machado: Tu verdad no; la verdad / y ven conmigo a buscarla. / La tuya, guárdatela. E tanto vale para un galego coma para un catalán.

Compartir el artículo

stats