Grazas á vida, programa de Producións Celta para a TVG2, propón esta semana aos seus espectadores un percorrido polos escenarios da traxectoria vital de oito novos invitados. Será en catro novas entregas que se emitirán de martes a vernes, ás 17.25 horas. O mar, a arte, a radio, a música e o sector sanitario son os ámbitos nos que se desenrolou a vida laboral destes oito galegos que teñen en común que xa superaron a idade de xubilación e acumulan anos de experiencia.
A presentadora do espazo, Noa García, recibe o martes aos dous primeiros invitados. Trátase de Nieves Fontán, que vendeu peixe polas rúas de Portonovo e nas prazas de abastos desta localidade e de Sanxenxo, e José Antonio Gómez, Joselito, mariñeiro e patrón de cerco que foi patrón maior de Portonovo e presidente da Federación de Confrarías de Pontevedra.
O programa do mércores contará con dous artistas como protagonistas. Un deles é J. Méndez Pitelos, pintor e escultor compostelán que xoga coa mitoloxía en obras que se moven entre o surrealismo e o barroco e tamén creador de escenografías para teatro e ópera. O outro artista convidado é César Lombera, un dos escultores con maior obra pública en Galicia –obra súa son as xa míticas Marías da Alameda de Santiago– e pioneiro do teatro de monicreques de rúa.
A voz creativa é o fío conductor da terceira entrega do Grazas á vida desta semana, que escoita, o xoves, o relato vital de dúas mulleres ourensanas. Son Nora Sola, locutora radiofónica, empresaria cultural e durante sete anos directora do Festival de Cine de Ourense (OUFF), e a cantante María do Ceo, dama do fado nacida en Porto, pero que chegou a Ourense de nena da man dos seus pais.
O capítulo do venres ocúpase doutras dúas mulleres, neste caso traballadoras sanitarias: Pura Seco e Isaura González. Pura foi enfermeira no “Pirulí” en Vigo, pero foi en As Pontes onde desenrolou case toda a sua carreira profesional: primeiro no Hospitalillo de Endesa e xa despois no centro de saúde de As Pontes. Isaura González, pola súa parte, estudou enfermería e conseguiu praza como matrona e traballou nos centros de saúde de Neda e Narón ata que se xubilou hai sete anos.
O programa, escrito e dirixido por X. H. Rivadulla Corcón, continúa así a poñer o foco sobre traxectorias singulares de galegos que destacan pola súa contribución, desde diferentes ámbitos, a construir a Galicia que coñecemos hoxe.
