Fórmase en 2017 esta banda do Deza coa pretensión de encher un espazo no rock galego que non estaba baleiro; como non hai máis sentidiño, non hai reparo en ocupalo sen pedir permiso.
Sen ancorarse nun estilo concreto, e bebendo (sempre) de diversas influencias dentro do rock, a forza e a enerxía dos seus temas lévaos a denominalo sinxelamente como caña do país. Letras que conteñen crítica social, constatación das realidades cotiás que os rodean, denuncia das desigualdades sociais, ao mesmo tempo que tratan outras temáticas como o amor, o desamor, a amizade, e tamén a troula.
Logo de participar en varios festivais e concertos como a Algarabía ou o Noceda Rock, entran nos Estudios Mafia (O Carballiño) en setembro de 2019 para a gravación do seu primeiro EP, publican en xaneiro de 2020 o vídeo do tema Animal Ferido.
MEU xorde da amizade, unha xuntanza de compañeiros que precisan amosar as súas inquedanzas en forma de cancións, e que perdurará mentres estean unidos.
Xuntos nos trunfos! Xuntos nos fallos tamén! J. Pardo.
WEB: www.quepasameu.com
