«Deixa un gran legado e unha fonda pegada»

Os testemuños de condolencia e recoñecemento sucédense desde que se coñeceu o falecemento de Henrique Harguindey. «Bo e xeneroso, grande e querido amigo que me regalou lazos de amizade e aire de vida coa súa palabra sabia e garimosa. Sempre na miña lembranza», expresa Xavier Gallego Souto, ao que Harguindey lle prologou e presentou hai pouco máis de un ano o seu primeiro libro de poemas, “Polos camiños da vida. Al aire de mi vuelo. Versos a mi madre”.

Tamén o artista e exdirector da Casa da Cultura de Cangas, Camilo Camaño Xestido, suliñou virtudes de Harguindey: «Quique asomounos unha luz realmente necesaria, imprescindible. Chegou ateigado de ilusionantes mensaxes que máis tarde levou a cabo como primeiro concelleiro de cultura no municipio... O importante legado que nos deixa, así como unha fonda pegada, serán quen de inmortalizalo. Quique Harguindey é dos mortos que nunca morreran». «Que a Terra lle sexa morna, e o derradeiro roteiro encetado cara ao país de ningures e sen retorno, grato e levadeiro. Aperta de buxo e ata o reencontro, prezado amigo».