Bueu distingue a Xosé Luis Mosquera e Lois Pérez nos Premios Johan Carballeira

Os Premios Johan Carballeira de Bueu xa teñen novos gañadores: Xosé Luís Mosquera no certame poético e Lois Pérez Díaz na categoría de xornalismo. Os xurados reuníronse esta semana e a entrega dos galardóns está prevista para o longo do mes de maio, co gallo dos actos do Día das Letras Galegas.

O premio de poesía chega a súa vixésimo sétima edición e contaba con 55 poemarios participantes. O xurado estaba composto polo gañador do ano pasado, Manuel López; a poeta e crítica literaria Oriana Méndez; e polo profesor da Facultade de Filoloxía e Tradución da Universidade de Vigo e escritor Xosé Henrique Costas. O texto premiado é “Trece maneiras de mirar un almanaque” de Xosé Luís Mosquera 

Os integrantes do xurado destacaron a súa “madurez literaria e contemporaneidade, que se amosa coa fluída integración de múltiples rexistros textuais e culturais no propio devir do poemario”. 

Nese fallo tamén se fai mención a que se trata dunha “proposta poética que destaca por combinar con habelencia múltiples rexistros dende o culto ao popular, con imaxes inesperadas e fragmentos de maior narratividade”. A conclusión final do xurado desta nova edición do Premio Johan Carballeira de Poesía e que “Trece maneiras de mirar un almanaque” vén a ser un “resultado exitoso que contribúe a consolidar o panorama poético das nosas Letras”. 

Numerosos premios

Xosé Luís Mosquera Camba é natural de Guísamo (A Coruña) e exerce como profesor de Secundaria desde o ano 1990. Xa ten publicado varios libros que foron premiados nalgúns dos certames poéticos máis importantes de Galicia, como “Nadja c’est moi”, que recibiu o X Premio Concello de Carral; “Amebas”, cun accésit do XXVII Premio Esquío de Poesía; “Das árbores tropicais e do amor”, que gañou o XX Premio Concello de Carral; “A traxedia da arquitectura”, que recibiu o IV Premio Xosé María Díaz Castro; ou “Parhelio”, que obtivo o XX Premio Fiz Vergara Vilariño.

No tocante ao Premio Johan Carballeira de Xornalismo, que neste 2024 celebra a súa vixésimo primeira edición, o xurado decantouse por “Eloxio do apenovismo”, de Lois Pérez Díaz e que orixinalmente foi publicado na revista “Luzes”. O título inclúe unha sorte de neoloxismo referido a autoestrada AP-9 xa que a reportaxe profundiza a interrelación entre a cultura e a construción desta vía que vertebra a franxa atlántica galega, desde Vigo ata Ferrol. Neste caso destácase a “orixinalidade á hora de abordar unha temática árida como as infraestruturas e capta a atención do lector/a dende o primeiro momento, facendo atractiva este tipo de información”. 

O xurado estaba composto polo presidente da Asociación Amigos de Johan Carballeira, Manuel García Mosteiro; o gañador da edición do ano pasado, Héctor Pena de Nós Diario; e a xornalista de FARO DE VIGO Carolina Sertal. No seu ditame abundan en que a reportaxe supón un “interesante percorrido de Norte a Sur que fai o autor recollendo espazos e momentos históricos moi ben imputados co trazado da AP-9”.

Lois Pérez Díaz é mestre, contador de historias, poeta, escritor e guionista e ten publicado diversas obras de literatura e poesía infantil. Con “A gruta da torre” gañou o V Premio Agustín Fernández Paz de Narrativa Infantil e Xuvenil pola Igualdade, mentres que “A tribo do mar” foi merecedor do XVI Premio Raíña Lupa de Literatura Infantil e Xuvenil.

Os premios Johan Carballeira, que entrega a Concellería de Cultura de Bueu, están dotados con 1.500 euros. No caso do certame de poesía o galardón tamén inclúe a publicación do libro por parte de Edicións Xerais.