O poeta e xornalista Miguel Sande é o gañador do XXV Premio Johan Carballeira de Poesía, que se fallou onte en Bueu. O xurado decidiu premiar o seu poemario “Brinde e desespero”, do que destacou a súa aposta pola prosa poética e por “romper con éxito a tensión entre pensamento e sentimento”.
A actual edición deste galardón ten un marcado carácter simbólico posto que é a número 25. Nesta ocasión presentáronse preto de 60 textos e o xurado reuniuse onte no Concello de Bueu para a súa deliberación. O tribunal estaba formada por unha das gañadoras da anterior edición, Xandra Táboas; polo profesor e crítico literario Manuel Forcadela; e o crítico e editor César Lorenzo.
No seu fallo suliñan que “Brinde e desespero” parte da “autofición para presentar unha lectura sobre o cotián desde o ángulo do inesperado”, unha realidade que “fala por sí mesma, cunha expresión formal contida”.
Aproveitando a reunión do xurado, a Concellería de Cultura aproveitou para organizar a presentación do poemario gañador o ano pasado, “Dou aulas de ioga por videoconferencia”, de Xandra Táboas e Adriam Mosqueira. Este acto tamén forma parte das actividades para conmemorar o Día do Libro, que se celebrou o sábado. A presentación foi na sala multiusos do Centro Social do Mar de Bueu, coa presenza de Xandra Táboas e do concelleiro de Cultura, Xosé Leal.
