O Concello de Moaña e os centros de ensino da vila poñen en marcha, por terceiro ano, a campaña “21 días en galego”. A intención é que os estudantes falen na lingua propia entre o luns 25 de xaneiro e o vindeiro 15 de febreiro. Neste senso a alcaldesa, Leticia Santos, emitiu un bando animando aos veciños que empregan habitualmente o castelán “a que asuman o desafío de botarse a falar en galego as 24 horas do día durante esta campaña”. Alega que a veciñanza “vivirá os problemas cos que se atopan as personas galegofalantes e sentirá a satisfacción de recuperar o noso xeito de falar”.
Cada centro de ensino enviou unha carta informativa sobre a campaña ás familias. Os alumnos de infantil, 1º e 2º de Primaria traballarán nas escolas con actividades arredor da lingua galega e levarán de agasallo unha viseira co logo da campaña.
É o alumnado maior, entre 3º de Primaria e Bacharelato, o que adquire o compromiso de falar só en galego durante 21 días. Os estudantes levarán unha insignia identificativa e participarán na gravación de vídeos colectivos que se farán públicos na web Caranvexo.gal.
Como non pode haber gala final, quen acade o reto levará de premio unha camisola da marca local “Afouta”, coa colaboración do grupo NAO Galiza. O Concello promoverá actividades nos colexios nestes días, como obradoiros de regueifa para os de 5º de Primaria ou os obradoiros “O mundo de Inho” para os de 6º curso.
