Os estudantes de 5º e 6º curso de Primaria dos colexios de Quintela, Tirán e Reibón participan esta semana na segunda edición dos obradoiros "O Mundo de INHO", que pretende que os nenos aprendan a ler textos escritos en portugués a través do coñecemento do galego. Con monitores de AGAL, traballan en distintos exercicios sobre as profesións e os diferentes xeitos de chamarlles nas dúas beiras do Miño.
Cada sesión dura 100 minutos (dúas clases seguidas) e cada grupo conta con entre 20 e 30 alumnos. Os obradoiros están programados polo servizo de Normalización Lingüística do Concello.
Os pequenos aprenden a proximidade que existe entre o galego e a lingua dos distintos países lusófonos. As actividades comezan coa escoita duns monólogos en portugués brasileiro describindo unha serie de profesións, onde comprenden as similitudes e diferenzas co galego.
