"Investigar non é só sentarse nun despacho, hai que falar coa xente"

Os seus traballos de investigación sobre a autoría do emblemático cruceiro do Hío, nos que conclúe que o seu artífice foi o mestre canteiro Ignacio Cerviño, déronlle sona nos últimos anos e despertou a curiosidade mesmo de colectivos de fóra do Morrazo, que o chaman para divulgalos, ainda que a súa paixón pola recuperación da memoria colectiva vén de máis atrás. "Sempre me gustou entrevistar á xente maior, recoller as cousas de antes e poñer en valor oficios tradicionais", sinala Anxo Coya (O Hío, 1974), que se mostra "moi satisfeito e agradecido" polo premio que lle conceden.

"Non contaba con este galardón porque hai moita xente preparada e con méritos para recibilo", sinala o autor dunha morea de traballos que publica periódicamente o FARO, mais tamén incide en que a súa labor vai máis alá da consulta de documentos históricos e adoita percorrer os lugares que transitou o personaxe e preguntar in situ a quen pode saber algo del. "Non só é sentarse nun despacho. Para saber máis de Ignacio Cerviño paseei por Cotobade, a súa terra natal e falei coa xente. Logo hai que contrastar e darlle credibilidade", insiste.

Esa dinámica é a que lle leva a concluír que o autor do cruceiro do Hío é Ignacio Cerviño, e non José Cerviño, como manteñen outros autores. Anxo Coya atopou documentos que acreditan que Ignacio Cerviño estaba no Hío arredor de 1872, cando se levantou o cruceiro, e mesmo que alí bautizou ese ano a unha filla súa, entre outros datos que corroboran a súa tese, que está aberta a novidades documentadas. Considera "unha honra" que un bisneto de José Cerviño o felicite, a pesar de que non lle atribúa o cruceiro ao seu bisavó.