Un novo rexurdir do millo corvo de Meiro

A aposta da Asociación Cultural Meiro de impulsar de novo a programación dos Encontros co Millo Corvo estivo recompensada cun éxito de público e de participación. O evento pechou onte a súa decimoséptima edición e o fixo con ánimos renovados de cara a seguinte, na que esta celebración declarada como Festa de Interese Turístico Galego cumpre a súa maioría de idade.

A carpa instalada na explanada do recinto da Casa da Aldea abriu novamente as súas portas a partir das 11.00 horas coa apertura da "ecotaberna", sen dúbida unha das iniciativas con máis éxito da festa. Os visitantes puideron comprar produtos, como o pan, feitos coa fariña corva ou degustar deliciosos pratos nos que esta variedade de millo estaba moi presente.

A programación da derradeira xornada incluiu dous novos obradoiros demostrativos. O primeiro correu a cargo da empresa de agricultura ecolóxica A Hortinha da Ponte, da zona de Terra de Montes. A súa actividade inclúe a produción de todo tipo de hortalizas e legumes a partir de sementes ecolóxicas. Onte o seu taller incluiu explicacións sobre o emprego de xerminados e os usos alimenticios das sementes. Unhas explicacións que se completaron coa elaboración de dous pratos: un frío, consistente nunha ensalada de verduras e froitos secos, e outro quente, que foron unhas lentellas vexetais. O segundo dos obradoiros foi o de Milhulloa, especializada en plantas medicinais e especias. A súa demostración estivo centrada na elaboración de manteigas aromatizadas.

A programación desta última xornada incluía a actuación do grupo tradicional Viruxe de Outono, da parroquia de O Hío. E a festa proseguiu pola tarde, co público dando boa conta dos produtos da "ecotaberna", xogos e máis música tradicional.