Recibir o Nadal dende un escenario

Os alumnos do colexio de Tirán deron onte a benvida ao Nadal cun festival no que se mesturou a música e o teatro. Os nenos de Educación Infantil cantaron paxoliñas diante dos seus pais e familiares, e os alumnos de cinco anos protagonizaron a obra de teatro “O Coelliño”. Os estudantes de primeiro e segundo curso representaron unha simpática obra en inglés na que, ademáis de demostrar un alto nivel da lingua de Shakespeare, pintaron a un moderno Papá Noel afectado pola crise e dirixíndose aos nenos do mundo a través de videoconferencia.

A mañá tivo incluso momentos para recuperar as tradicións máis puras do Nadal galego, así os alumnos de terceiro e cuarto levaron a escea a lenda do Apalpador, figura dun mítico carboeiro que deixa agasallos aos nenos e que se atopaba practicamente desaparecida. A labor de centros sociais e colectivos culturais fixo que esta lenda se recuperase nos últimos anos. Os integrantes destas mesmas aulas remataron o seu espectáculo co rap “I´m from Tirán”.

Os máis maiores do colexio representaron teatralmente a evolución do Home, parodiando incluso unha fuxida dun Paraíso aburrido. Tres pais de alumnos encargáronse do chamativo traballo de maquillaxe. O centro foi visitado polos Reis Magos.

Domaio e Cela

Esta mañá os alumnos do CEIP Domaio e do colexio A Torre, de Cela celebran os seus festivais de Nadal. En Domaio haberá música e unha exposición de árbores con materiais de refugallo (12.45 horas).

No colexio de Bueu non faltarán as panxoliñas e un nacemento. Comeza as 10.30 horas.