Queremos Galego enche as rúas de Compostela e pide actuar ante «a emerxencia da lingua»

«Na escola e no traballo queremos galego» foi unha das frases máis escoitadas este domingo en Santiago, onde miles de persoas encheron as rúas da cidade en defensa da lingua. A manifestación, convocada pola Plataforma Queremos Galego, que agrupa a 600 colectivo sociais, busca denunciar a «emerxencia lingüística extrema» que vive o idioma.

Tambores, gaitas e pancartas reivindicativas tomaron a cidade dende a Alameda ata o Obradoiro, nunha movilización ata a que se achegaron persoas de diversos puntos da comunidade ata nunha trintena de autobuses. A manifestación coincide, así mesmo, co Día de Rosalía.

«A lingua é vital para a nosa existencia como pobo. A sociedade está disposta a actuar ante a emerxencia da lingua, o que cómpre é que o Goberno galego tamén o estea», sinalou Marcos Maceira, presidente da Mesa pola Normalización Lingüística. Neste sentido, incidou en que o Executivo liderado por Alfonso Rueda «se quere tomar medidas sabe moi ben o que ten que facer».

Tamén presentes representantes políticos, entre elas a portavoz nacional do BNG, Ana Pontón, quen criticou que o PP leva «15 anos de politicas de derribo e acoso contra o galego». Así, unha vez máis, pediu a derogación do decreto de plurilingüismo, «o decreto da vergoña», que «está provocando que os nenos e nenas entren pola porta da escola falando galego e saian falando castelán».

Pola súa banda, o secretario xeral do PSdeG, José Ramón Gómez Besteiro, esgrimiu antes de que dese comezo a manifestación que se trataba dun encontro que «non é en contra de ninguén, senón en defensa do galego». «Unha mensaxe clara ao PP: que escoitei o que os galegos dicimos hoxe, hai que preservar o idioma», resaltou.

A coordinadora da plataforma convocante, Celia Armas, resaltou na súa intervención nunha praza do Obradoiro chea que «o noso presidente da Xunta é o único incapaz de defender a nosa lingua en Europa». Estas declaracións prodúcense tras o paso de Rueda esta mesma semana polo Comité Europeo das Rexións, no que resultou elexido como un dos vicepresidentes da institución da Unión Europa.

O cantante Mondra foi o encargado de poñerlle o ramo á xornada. Unha foliada improvisada fixo bailar aos manifestantes nunha mobilización que a organización definiu como «histórica».