Ana Pontón transmite satisfacción polo momento que atravesa o BNG e cansanzo logo da asemblea nacional desta fin de semana na que foi reelixida portavoz nacional. Rexeita a etiqueta de independentista e tira de retranca ante as críticas do PP aos seus 17 anos como deputada, pois tomou posesión no 2004 por primeira vez.
Hai uns anos, en pleno apoxeo de Podemos e as mareas, díxome nunha entrevista que os anos 90 non volverían para o BNG. Parece que se trabucou. Por que vive o BNG este momento e Galicia volveu ao tripartidismo?
Voulle levar a contraria. Non estamos nos 90, estamos no 2021. E mudaron moitas cousas. Hoxe temos un BNG más unido e cohesionado ca nunca, que colleitou o seu maior número de escanos e estamos en disposición de desputarlle a hexemonía ao PP. É o obxectivo que nos marcamos na asemblea: dirixirnos á maioría social para darlle un futuro mellor chegando á Presidencia da Xunta.
Como quere ampliar a base social do BNG?
Como ata agora. Imos seguir facéndoo porque nos últimos anos cada vez máis galegos están apoiándonos electoralmente e moitos outros coinciden con propostas nosas como que temos dereito a unha tarifa eléctrica propia, que hai que parar o bum eólico depredador, que precisamos a chave dos nosos cartos ou que debemos rachar con ese centralismo que fai que Galicia perda. Cada vez que deciden por nós, deciden contra nós. E nós queremos un proxecto para que Galicia gañe. Iso pasa por que cada vez máis galegos confíen na única forza política galega que ten as mans libres para defender o país.
“O BNG nunca se definiu como independentista, é nacionalista e quere darlle un futuro mellor á xente”
Por que se renuncia ao independentismo? Pasan de defender a República Galega ao “soberanismo”. Que significa?
O BNG está onde sempre estivo: no nacionalismo. É tan así que levamos no nome o que somos: o Bloque Nacionalista Galego. Iso significa defender que Galicia é unha nación, que temos o dereito a deixar nas mans da cidadanía galega as decisións máis relevantes e aí é onde estivemos e onde imos seguir estando.
Vostede quere unha Galiza independente?
Quero unha Galicia na que a xente teña futuro. Tivemos unha asemblea na que apostamos polo nacionalismo. Non hai novidade.
En documentos do 2017 falaban de constituír a República Nacional Galega e a UPG pula por instaurar un Estado galego. Non hai cambio?
O BNG nunca se definiu dese xeito e xa puxo no seu nome o que é: nacionalista. Temos os mesmos principios da nosa fundación e estamos traballando no día a día dos galegos, en darlles alternativas aos seus problemas e poñer solucións. A curto prazo temos un obxectivo claro: gobernar este país para darlle un futuro mellor á xente que vive aquí. Xa está ben de que se pechen empresas e non haxa alternativas, de que a xente teña que emigrar, de dicirlle aos mozos que o seu futuro é a precaridade ou de que os recursos do país sirvan para que grandes lobbys económicos se forren mentres esa riqueza non xera máis benestar. Iso é o que defendemos sen renuncias de ningún tipo. O BNG sempre se definiu como nacionalista e non con ningunha outra etiqueta.
Gustaríalle vivir nunha República Independente galega?
Non é un problema do que che guste ou non, senón de cal é a folla de ruta trazada desde o realismo e cos pés na terra desde a Galiza de 2021.
Eliminaron o límite de tres mandatos para cargos institucionais e o PP critica que vostede leve case dúas décadas no Parlamento. A que obedecen esas críticas e por que quitan ese tope?
O PP está obsesionado co BNG. Ese nerviosismo delata que saben que a alternativa real ao PP é o BNG. É sorprendente que un partido que acaba de obter maioría absoluta estea máis centrado en facerlle oposición ao Bloque e á súa portavoz nacional que en gobernar. Se a única crítica do PP é que levo moito tempo adicándome a defender este país, é unha medalla que me colgan.
Considérase unha política profesional?
Non, considérome unha política vocacional. Non temos que criminalizar a política.
Vese competindo con Feijóo no ano 2024?
Tres anos en política é moito tempo. Estarei onde a militancia decida. O que si vexo é ao BNG competindo para que Galiza teña por primeira vez unha Presidencia do BNG.
Se mañá fose presidenta da Xunta, que tres medidas máis urxentes tomaría?
O primeiro sería reverter os recortes en sanidade, sobre todo en Atención Primaria; o segundo, poñer en marcha un plan para industrializar o país e xerar emprego de calidade; e o terceiro, apostar pola ciencia e a innovación.
“O machismo existe en todas as esferas, tamén na política”
Defende a necesidade de pór o foco no feminismo. É machista a política galega?
Negar que existe o machismo sería negar a realidade e está en todas as esferas, tamén na política. Se algo me motiva é construír unha política máis feminista, apoderar as mulleres do país e construír unha Galicia igualitaria. Temos que poñerlle o turbo ás políticas feministas porque estamos fartas de agardar.
O BNG denuncia que moitos nenos entran na escola falando galego e saen falando castelán. Teme que lle pase á súa filla o ano próximo?
Non lle toca [ir a escola] o ano que vén, senón ao seguinte. Pero iso non é un temor, é unha realidade. Hoxe en día, temos miles de pais denunciando queos seus fillos entran na escola falando galego e saen falando castelán. É responsabilidade dun decreto [da Xunta] vergoñento que non debería seguir en vigor. Estase menoscabando o dereito dos pais a educar os seus fillos en galego.
