Luís Villares gañou as primarias co 60% dos votos, pero os críticos non recoñecen os resultados e sobre En Marea sobrevoa a ameaza de ruptura. Sen embargo, para o voceiro da formación os resultados das eleccións son un punto e final ao enfrontamento. Pide aos críticos que tomen nota dos resultados e insiste en tender a man para recompoñer o espazo político conxunto.
-Gañou as primarias co 60% dos votos. Como valora a vitoria?
-Unha diferenza de 20 puntos é unha diferenza importante. A xente valorou que quixeramos facer protagonista a toda a militancia.
-Os críticos denuncian "pucherazo". Pensa que pode ser unha excusa para marchar de En Marea?
-Están no seu dereito a denunciar o que queiran. Pero ata o de agora o que quedou acreditado é que o único intento de "pucherazo" que houbo foi o da xente que entrou indebidamente no censo.
-Pode romper En Marea?
-Eu non imaxino quen podería querer romper e por que. Que alguén explique cales son as razóns políticas para separarse. Eu non escoitei nunca unha soa diferenza política que puidese xustificar unha ruptura do proxecto.
-Pero houbo acusacións moi graves, denuncias á Fiscalía, á Garda Civil...
-Algunhas cousas que se dixeron eu encádroas no nerviosismo propio do momento electoral. Quero pensar que non as pensaban realmente. Hai que restarlles ferro. Eu fago un chamamento á responsabilidade. Nestes dous anos os críticos non participaron nos órganos de En Marea con regularidade. E gustaríame contar con eles.
-Vostede quítalle ferro, pero pensa que a cidadanía os pode visualizar como alternativa ao PPdeG despois do que aconteceu?
-Non lle quito ferro, sitúoo no seu contexto.O que pido agora é pechar feridas, pechar filas e construír un proxecto alternativo a Núñez Feijóo. O momento de falar de nós acabouse. Non me cabe pensar que por parte da outra candidatura se siga pensando en enredar. É necesario restaurar a confianza.
-Os críticos sopesan abandonar En Marea. Teme que poida haber unha escisión do grupo parlamentario na Cámara galega?
-Toca reflexionar sobre os resultados. Hai que escoitar ás persoas que votaron. Apoiaron un proxecto unitario e colectivo, non un proxecto de capeliñas e suma de siglas.
-Fixo un chamamento á reconciliación aos alcaldes do cambio. E con Podemos?
-Eu distinguiría a cúpula das bases. Tentouse manipular ás bases como se fosen brazos de madeira nestas primarias. A xente de Podemos é maior de idade e non obedece cegamente ao seu secretario xeral, porque aquí non hai mesías.
-Entón, ve posible traballar man con man co secretario xeral de Podemos en Galicia?
-Antón Gómez-Reino, á parte de ser líder de Podemos, é o voceiro de En Marea no Parlamento español, polo tanto, é desexable que podamos entendernos. Pero eu penso que estas eleccións foron unha chamada de atención para corrixir certas cousas e sei que Gómez-Reino vaino entender perfectamente.
-Falou cos alcaldes do cambio logo de resolverse as primarias?
-Non. É epoca de festas...
-Pensa que a dirección de Anova se equivocou ao aliñarse coa lista dos críticos, cando o polo nacionalista está nucleado en torno á súa candidatura?
-Ten lexitimidade para aliñarse con quen queira. O que eu non entendería é que dende Anova se alentase una ruptura porque sería a antítese do proxecto soñado por Beiras. Sería un erro gordísimo e ninguén llo perdoaría. Sería contrariar ao espírito de Beiras.
- Falou con Beiras utimamente?
-Non nas últimas horas, pero si ao longo de todo este tempo. É de louvar a súa prudencia e sabedoría, apartándose. Había dous proxectos e neses proxectos había xente da súa propia organización.
