Vanessa Rodríguez Pousada: «Falemos de sexo (e ben): Ferramentas para educar en familia»

Psicóloga Xeral Sanitaria, Psicopedagoga e Sexóloga cunha longa traxectoria na intervención educativa, terapéutica e institucional con mozos e familias, Vanessa Rodríguez Pousada estará como poñente na IX edición do Foro de Educación Faro Educa cun relatorio no que trazará unha panorámica xeral das adolescenciais contemporáneas, incidindo nos seus aspectos comúns respecto as adolescencias de outras épocas e nas particularidades propias das actuais. Asemesmo, abordaranse as características da sexualidade, os factores sociais implicados na violencia sexual e analizaranse distintos discursos sobre os efectos do porno na adolescencia.  

Rodríguez Pousada é ademais profesora colaboradora da UOC no Máster de Psicopedagoxía e Membro fundadora de ASEIA (Asociación para a Saúde Emocional na Infancia e a Adolescencia), vicepresidenta de SOGASEX (Sociedade Galega de Sexoloxía) e forma parte da xunta directiva da FESS (Federación Española de Federaciones de Sociedades de Sexología. É coautora dos libros “La lucha sexual de los adolescentes en la hipermodernidad” (UOC, 2018), “Ser adolescente. ¿Transición o destino?” (UOC, 2021) y “La violencia adolescente en clave relacional” (Ágora Relacional, 2025) . Na actualidade, investiga sobre temas de adolescencia e sexualidade. 

Neste obradoiro ofreceranse ferramentas básicas para acompañar a educación sexual das crianzas e adolescentes desde o ámbito familiar. Traballarase como abordar a sexualidade con naturalidade, información rigorosa e coidadosa, adaptada ás diferentes etapas evolutivas.