Miguel A. Alonso Diz: «Ensinar dende a LIX»

Escritor, poeta, docente, contacontos, presentador, animador, divulgador cultural e sobre todo persoa. Así se define Miguel A. Alonso Diz encargado nesta IX edición do Foro de Educación dunha actividade práctica na que amosa como, a través de diversos libros da nosa literatura infantil e xuvenil, se poden achegar ao alumnado diversos conceptos tanto relacionados con materias propias do currículo escolar como as que teñen que ver co proceso de socialización.

Ademais traballará como achegar os contidos en lingua galega fomentando sempre a imaxinación e a creatividade. Terase en conta non só a narrativa senón tamén a poesía, a banda deseñada e o teatro como ferramentas das que nos podemos valer para acadar os nosos obxectivos. 

Miguel A. Alonso Diz pertence ademais á directiva de GÁLIX – Asociación Galega do Libro Infantil e Xuvenil. Ten obra traducida ao castelán por el mesmo, e editada para fóra de Galicia, que está presente en colexios e bibliotecas de México, Puerto Rico e diversas comunidades de España. 

Colaborador habitual dos Servizos de Normalización e Dinamización Lingüística, realiza diversas actividades creativas en asociacións, bibliotecas e centros educativos, nos que achega á rapazada e adultos o mundo da literatura, a creación e o seu amor polo noso idioma.  

Dende a súa irrupción no panorama literario infantil - xuvenil galego co primeiro libro en galego editado a través do sistema de micro mecenado – crowdfunding, xunto á ilustradora Luz Beloso, estivo presente nas listas dos libros máis vendidos en Galicia.