Unha nova viaxe pola memoria

Recoñecida pola UNESCO como modelo de boas prácticas, a Asociación Cultural e Pedagóxica Ponte…nas ondas! leva máis de vinte e cinco anos traballando na divulgación do Patrimonio inmaterial galego-portugués. Coordinados por docentes galegos e portugueses, milleiros de alumnas e alumnos teñen participado en certames como Imaxes do Patrimonio, que cumpre xa sete edicións retando aos estudantes de toda Galicia a buscar, xunto a súa familia, imaxes do pasado. 

O resultado? Extraordinario, tal e como quedou claro o pasado venres, cando, coincidindo coa véspera do Día Internacional do Patrimonio, a asociación fixo entrega dos galardóns cunha gran festa no Centro Veciñal e Cultural de Valadares, na que participaron un total de 18 centros escolares e na que non faltou a actuación de Paco Nogueiras.

Un alambique ambulante por terras de Amandi, a primeira fábrica de gaseosas do concello de Laza a comezos do século XIX, unha estampa da vendima, un tataravó palangreiro en terras do Barbanza, ou un concurso de vestidos de bonecas nos anos 50 do século pasado son só algunhas das valiosas imaxes que sacou á luz o certame grazas ao traballo do alumnado. Unha nova e fermosa viaxe pola nosa memoria que, un ano máis, serve para reivindicar a importancia de traballar por dar a coñecer as nosas tradicións e historia.

‘Old… pero así de old?’

Prema aquí para ver as fotografías.