As historias e curiosidades do fondo do mar

Se alguen coñece de primeira man os segredos que oculta o océano é a CEMMA (Coordinadora para o Estudo dos Mamíferos Mariños). Por iso, hoxe comparten con nós algunhas das curiosidades máis sorprendentes das especies acuáticas, así como algunhas reflexións sobre a contaminación do seu ecosistema.

As tartarugas que se comen todo como o roomba

Un dos problemas máis graves que temos no mar son os residuos de orixe humano e terrestre, de xeito que a columna de auga está chea de lixo, sobre todo plásticos, de todo tipo e tamaño. E estes afectan negativamente a moita fauna mariña, entre elas ás tartarugas.

As tartarugas navegan polo Atlántico dende as súas praias de posta no Caribe usando a corrente do Golfo, que percorre de xeito circular todo o Atlántico no Hemisferio Norte. Un camiño que dura anos, ata que voltan ao Caribe de novo para reproducirse. Pero resulta que as tartarugas mariñas son moi disciplinadas e levan á boca todo o que lles cabe, son coma o roomba, ese aparato que temos na casa e que come todo o lixo que atopa. O problema é que moitos plásticos poden causar graves consecuencias no seu sistema dixestivo.

A Galicia chegan tartarugas mariñas comúns, Caretta caretta, xuvenís, e deben ser recollidas todas para pasar un período de cuarentena nas instalacións da UCI da CEMMA. Durante a primeria semana defecan dúcias de pásticos de todas as formas e cores. Afortunadamente podemos devolvelas ao medio mariño unha vez rehabilitadas co seu sistema dixestivo limpo de lixo.

A súa maxestade o polbo

Os anfibios, réptiles, aves e mamíferos temos o sengue vermello. Iso é pola hemoglobina, unha proteína que está dentro dos glóbulos vermellos, as células do sangue que transportan o osíxeno. Está formada por catro cadeas que levan un átomo de ferro, ao cal se une o osíxeno, e permite o transporte e a respiración celular. Pero non todos os animais presentan este tipo de transporte de osíxeno. Por exemplo, os moluscos e crustáceos en troques de hemoglobina dispoñen de hemocianina , e utilizan un átomo de cobre en vez de ferro. Isto ocasiona que o sangue sexa de cor azul en vez de vermello. Así que a partir de agora debemos tratar aos polbos de maxestade, por ser de sangue azul.

Comportamentos de CONFI

CONFI é un arroaz solitario denominado embaixador, porque socializa cos humanos. Entre as moitas destrezas que ten hai unha que consegue avergoñarnos, pero moito, moito, moito. Hai momentos onde lle gusta exhibirse diante dos humanos e demostrar as súas destrezas, como por exemplo cando salta ou realiza complicados movementos de natación e acrobacias. Pero ás veces cando se atopa con xente diante o que fai é recoller cousas do fondo, obxectos de orixe humano e amosalos sobre a superficie do mar.

Posiblemente trata de ser amable e devolver o que considera de orixe humano e que pensa que se caíu accidentalmente pola borda. Así, un día en Muros sacou cabos, paus, tubos e ata unha silla de praia para a superficie.

Iso é unha verdadeira vergoña porque eses obxectos non deberían estar no fondo do mar.