Harmonías e primavera

Cibrán García constitúe a metade de Boyanka Kostova, dúo que remexeu, e ben que o levou a cabo, as augas xa quentes de seu do ecosistema das nosas novas músicas contemporáneas. Boyanka levaron ou, máis ben, trouxeron ao país unha nova volta de parafuso a un trap que maridou como nunca con toda a retranca galega e así mesmo coa mestura perfecta entre a esencia das novas músicas urbanas e mais os elementos chantados a lume e ferro na nosa identidade.

Xunto con Chicho do Funk (Ortiga), Cibrán move marcos e desafía chamando ao baile e tamén a ese certo humor intelixente no que socialmente nos vemos reflectidos moitas e moitos aínda incluso coa diferenza xeracional enriba da mesa. Agora Cibrán está a presentar un novo proxecto baixo o nome de Saibran e desta vez con dous socios ben cercanos a el e xa baqueteados en moitos palcos baixo marcas tan acaídas como Mundo Prestigio: Julián Goicoa (baixo) e Fiz García (batería).

Xuntos veñen de publicar Atardecer harmonioso con gotas de primavera (Tremendo Audiovisual, 2025), disco que, ademais, presentan como a primeira parte dunha triloxía que se dispón a percorrer todas as emocións e experiencias vitais, e cotiás, que envolven a existencia humana dende o solpor até o mencer.

Trátase, pois, de tres discos para achegarnos esa mirada tan persoal e cargada de encontros, desencontros, horas de compartir, días e noites, momentos solitarios e todo ese ineludible ritual das nosas rutinas nunha cidade galega. Este primeiro da entrega foi gravado polo propio Julián Goicoa e composto por Fiz e Saibran e nel atopamos sete cortes (máis unha pista extra que propoñen como enlace para cando publiquen o segundo volume da triloxía) nos que atopamos un abano de sons e cores que van dende o rap máis evidente ao trap máis urbano, pero tamén con moitas pingas funk, soul, pop e incluso, e por momentos, rispando con certa psicodelia.

Con letras cargadas de referencias sociais, culturais e musicais este Atardecer harmonioso con gotas de primavera lévanos da man polos carreiros da existencialidade máis común e por territorios que, por deviren humanos e recoñecibles, se fan altamente gozosos e sanadores. Atopamos, daquela, cancións que, aínda coa electrónica no seu sitio, xorden tamén con moito peso orgánico, a falaren da vida, do paso do tempo, das teimas que temos e de como somos quen de respirar no medio do vórtice.

Cortes cargados de xeito e tirando honestidade a caldeiros con títulos como «O quinto mundo», «Cubata en vaso de tubo», «Puretismo» ou a nosa preferida «Durmir é para covardes» chegan para facer de Saibran un dos proxectos rapeiros máis recomendables e gozables da nosa escena.

Coa colaboración dos Mundo prestigio e do DJ Mil nun par de cortes, prometen os Saibran unha xira para presentar esta primeira entrega mentres se nos poñen os dentes longos á espera dos dous seguintes discos que, en breve e segundo anuncian, axiña estarán a caer. De momento podemos ir gozando destes temas en todas as plataformas e tamén nun valorable formato en vinilo deseñado por Maru Astray.

Suscríbete para seguir leyendo