Ante o milagre da vida
Como refacer o mundo coas palabras
Oriana Méndez
Os días, a última achega poética de Ricardo Martínez Conde, pretende dar resposta a algunhas das preguntas fundamentais do xénero: como refacer o mundo coas palabras, como escribir diante das dúbidas. A voz poética presenta unha actitude introspectiva que indaga na perplexidade do mundo e da vida, un talante inquisitivo que se fascina ante o enigma do destino, que é o mesmo que o do paso do tempo: “Mana o río, a súa sorte no tempo/que nos nutre/pero non acerta a dicirnos o que é real”. A ollada existencialista e extrañada sobre as cousas ou sobre as ideas avanza con alento elexíaco, pois non se detén a interrogante sobre a memoria, sobre a soidade e a fraxilidade da que o ser humano se envolve. Está presente a incerteza de todos os momentos, a transitoriedade inherente: “Memoria, esquecemento: que ceo é o seu reflexo, o seu espello?”
O poema desenvólvese valéndose da columna versal en textos breves que procuran a sinxeleza e a concentración do sentido, sen deixar por iso de introducir incisos entre parénteses serven para matizar o sentido central ou, ao contrario, para se converter eles mesmos en sentido central, pois, nesta poética que procura unha ollada delicada, aquilo que é revelador pode abrollar no máis inesperado, no menor, naquilo case inadvertido que a voz poética recolle para llo facer chegar a quen lea, buscando a comunicación.
En definitiva, do mesmo xeito que a simplicidade se combina co coidado da lingua, o abraio existencialista aparece subitamente no contexto realista da experiencia: “Aí están o escritorio, as flores/no seu vaso, a paciente tristeza”. Porque o que se procura é dar conta da admiración ante o milagre da vida cotiá.
OS DÍAS (2023): R. Martínez Conde,A Coruña, Medulia, PVP. 15€
Suscríbete para seguir leyendo
- Faro da Cultura“Hai xente que aínda cre que os guerrilleiros eran uns bandidos”
- Faro da Cultura“O fío condutor de 'Memorias dun neno labrego' é a soidade”
- Faro da CulturaAs vidas secretas da arte
- Faro da CulturaDe deuses e heroes
- Faro da CulturaLibros recomendados da semana
- Faro da Cultura“Nunca imaxinei que tería que chorar tanto para escribir esta novela”
- Faro da CulturaMemoria de “La Chicharra”
- Faro da Cultura“O galeguismo tivo un papel esencial na creación da nosa primeira emisora de radio”
Faro da Cultura
Con rock e cores estilísticas
Patrimonio
Divina xeometría
Arte: exposicións