Desbotando os estereotipos

Xogar co factor sorpresa é sempre rendible se falamos en termos de recepción, a miúdo resulta un valor apreciable que os lectores perciben sempre como atractivo. Ademais trátase dunha estratexia que tenta atrapar o contista que habita en cada un de nós, xa que contar historias parece natural e cáseque ineludible nos seres humanos, a estrutura misteriorsa de relatar cruza as mentes humanas a ata podería dicirse que é constitutiva da linguaxe.Por iso, para coller desprevido e marabillar o lector Manuel López O Hematocrítico non dubida en desbaratar contos clásicos, asociar imaxes imposibles, retorcer a expresión espremendo ao máximo o zume e así causar a estrañeza precisa que prende no maxín unha sorte de admiración extraordinaria.Ao mesmo tempo, procura a achegar valores e levar veracidade alí onde aniña a suposta irrealidade para dende aquí lanzar unha mensaxe que reiuvindica o dereito a ser diferente.

Moncho é un can que come ósos, carne e penso e traballa coidando ovellas, pero o seu aspecto dista moito da imaxe que outros personaxes teñen do mamífero que ladra e este non ten máis remedio que amosar os seus dotes caninos e demostrar que é un cuzo coma outro calquera.

Para sensibilizar as persoas sobre calquera forma de discriminación é preciso actuar sobre os estereotipos e os prexuízos cara os seres que son diferentes, afrontar a diversidade como unha forma de enriquecemento do que todos se benefician e no que todos gañan. Pola súa parte, o humor, que se exhibe neste volume, pode ser un bo recurso para a educación na tolerancia, no respecto e na convivencia harmónica e a colección que inicia estes libros -Os Hematiños- que vén de encetar Edicións Xerais de Galicia pode contribuír a iso.

O HEMATOCRÍTICO, Un can, (Ils. Alberto Vázquez), Xerais, Vigo, 2021, PVP. 9, 50 €

Suscríbete para seguir leyendo