James Rhodes é un coñecido pianista inglés que vén de publicar Instrumental, unha autobiografía intensa que narra atroces experiencias vitais. A primeira de todas elas, a violación da que foi vítima aos cinco anos, e durante varios máis, a mans dun mestre de ximnasia, orixe de moitos males posteriores que o aflixiron: alcolismo, drogas, paso por psiquiátricos, cinco intentos de suicidio, perda da custodia do fillo… Desa viaxe ao inferno Rhodes consegueiu saír a flote grazas á música, que co seu poder feiticeiro serve de táboa de náufrago a un home que ama a vida e que está disposto a denunciar as situacións de violación ao tempo que busca achegar ao gran público autores como Bach, Beethoven, Chopin, Ravel...
O libro vai combinando en cada capítulo, a modo de disco, unha introdución que leva por título o dunha obra para piano, con episodios importantes da vida do autor. Cada capítulo debe acompañarse da audición da peza en versión de autores admirados por Rhodes como vén ser o casode Glenn Gould ou Krystian Zimerman, algo moi na liña de Rodhes de procurar que a música clásica saia do Olimpo elitista que el tanto rexeita, ata o punto de dar concertos falando co público e vestido con camisetas nas que figuran os seus autores favoritos.
Escrito con estilo coloquial, con descarnada valentía, estas “memorias de música, medicina e loucura” amosan unha vida intensa e asemade a personalidade peculiar dun autor que no 2010 asinou un contrato coa maior discográfica de rock do mundo e que, malia as dificultades da súa tormentosa vida, deu concertos nas grandes salas e soubo manexarse cunha grande facilidade nos medios de comunicación.
RHODES, James, Instrumental,Rinoceronte, Cangas, 2020, PVP. 19,90 €
