Na colección "Demademora" de Kalandraka Editora vén de publicar Marina Núñez o seu conto Atrapamiradas no que as ilustracións de Avi Ofer interpretan dunha forma singular o desexo de Vera de atopar unha solución a súa teima de captar as miradas dos adultos, empresa que se lle antolla moi complicada porque nin sequera na casa consegue aquilo que lle ronda no maxín e que a ten verdadeiramente preocupada, claro que sempre haberá alguén que, vendo máis alá do que ten diante e escoitando os latexos do corazón, está disposta a axudar á neta na súa procura de atención.
A proposta plástica con característicos trazos quebrados e repetidos, isto é, con liñas seguidas unhas tras outras varias veces e tamén irregulares superpostas unhas a outras, permite unha lectura paralela do texto que vai máis alá do significado superficial das palabras e afonda na importancia que cobran xestos cotiáns, a miúdo, perpetuados na espiral do día a día e que non reparan na verdadeira esencia do realmente trascendente. Nun mundo no que a imaxe acapara a atención e na que os dispositivos tecnolóxicos veñen ser unha prolongación das nosas extremidades, descóidase aquilo que fai feliz ao swer humano: ser tidos en conta, que nos vexan e nos miren cos ollos e co corazón e iso é o que reclama e consegue a protagonista da historia dirixida aos cativos que han ir analizando e interiorizando que sucede ao seu redor porque todo axuda no prolongado e nada doado proceso de formación.
NÚÑEZ, Marina, Atrapamiradas (ils. Avi Ofer), Kalandraka, Pontevedra, 2020, PVP. 12, 35 €
