O extremo máis setentrional da provincia coruñesa e Galicia, aí onde conflúe o Atlántico co mar Cantábrico, destaca pola disposición dun patrimonio xeolóxico tan excepcional que está en proceso de certificación baixo a figura de proxecto de Xeoparque da UNESCO.
O proxecto de xeoparque de Cabo Ortegal comprende unha superficie de case 630 km2 integrada polos concellos de Cariño, Cedeira, Cerdido, Moeche, Ortigueira, San Sadurniño e Valdoviño.
Proxectándose cara aos cabos de Ortegal e Estaca de Bares, estes cantís marítimos non só son os máis altos da Europa Continental senón que, ademais, a súa formación remóntase 350 millóns de anos atrás cando os seus materiais se atopaban a 70 km de profundidade oceánica.
Atravesar a Serra da Capelada e tomar unha panorámica desde o seu teito, o miradoiro de Vixía Herbeira, a 650 metros do mar é unha das moitas actividades que se poden realizar neste lugar. Ademais de facer sendeirismo polo Camiño da Costa e contemplar a impoñente vista da ría de Ortigueira pasando polo "mellor banco do mundo", o banco de Loiba, coñecido amplamente en redes sociais por ser un banco fronte ao océano con impoñentes vistas.
Converter esta área en xeoparque tería por finalidade garantir o desenvolvemento sustentable da economía local e dos produtos do territorio, fomentar a educación ambiental e o turismo sustentable, organizar eventos científicos así como protexer e conservar o patrimonio.
Ademais, o feito de que Cabo Ortegal se convertese en xeoparque implicaría que se desen a coñecer os recursos, tanto patrimoniais como naturais, a nivel mundial. Isto veríase posibilitado grazas a que o xeoparque pasaría a formar parte da rede global de xeoparques mundiais da UNESCO, o cal tamén se traduce nun claro compromiso co desenvolvemento local.
