A Estrada abre boca nas vísperas do día grande da Festa do Salmón

A conta atrás para a LII Festa do Salmón xa está en marcha e A Estrada quenta motores cun dos eventos gastronómicos máis agardados da primavera: as Xornadas de Tapeo do Salmón, unha cita que converterá a vila nun gran escaparate culinario entre o venres 8 e o domingo 10 de maio.

Durante tres días, veciños e visitantes poderán percorrer bares e restaurantes da localidade degustando creacións elaboradas co auténtico rei do río como protagonista. En total, serán quince establecementos locais os que participen nesta edición, apostando por receitas que mesturan tradición e innovación.

O tapeo desta fin de semana servirá tamén como antesala perfecta para a agardada Festa do Salmón, que celebrará o seu día grande o próximo domingo 17 de maio cun amplo programa gastronómico, cultural e festivo promovido polo Concello da Estrada.

Roteiro gastronómico

As tapas poderán degustarse hoxe en horario nocturno, o sábado ao mediodía e á noite, e o domingo ao mediodía, permitindo que tanto estradenses como visitantes poidan organizar un auténtico roteiro gastronómico polas rúas da vila. O prezo popular de 3 euros por tapa converte a proposta nun plan perfecto para compartir en familia ou con amigos.

Os establecementos que se suman á convocatoria deste ano son Samaná, Cepa e Viño, As 3 Portiñas, Argentinos Burguer, Velis Nolis, Malo Será, Enredo, A Lacena de Chucha, O Candil de Silvia, Andalucía, Eureka, Oasis, O’Lar, Os Peares e Inferno.

Las 15 tapas del Salmón

Ver galería

Non faltarán elaboracións sorprendentes, combinacións creativas nin receitas que reinterpretan o salmón desde unha perspectiva contemporánea sen perder a súa esencia.

Moito máis ca salmón

A programación deste ano dará un paso máis coa gran carpa instalada na Praza da Constitución, que se converterá no epicentro da actividade cultural e festiva durante varias semanas. O Concello apostou por ampliar o espazo tras o éxito da pasada edición, coa intención de responder ao incremento de participación tanto na Festa do Salmón como na Feira da Sidra.

O alcalde, Gonzalo Louzao, destacou durante a presentación da programación a vontade municipal de crear “unha programación ambiciosa de primavera” combinando artistas locais e propostas de primeiro nivel para consolidar A Estrada como referente festivo e cultural.

Entre os eventos destacados, ao marxe da LII Festa do Salmón do 17 de maio e da Feira da Sidra do 6 de xuño, están o Latexo Fest co DJ Kiko Rivera o venres 15 de maio; concerto de Mondra o sábado 16; o Salmón Rock da escola Musikenos o día 22; o Son dos Arrieiriños, o sábado 23, a Romaría Celtista o 29 e 30; concerto Xacobeo con Ünder & Diego Flaneur, Kid Mount e DJ Kike Varela o venres 5 de xuño; exhibición da escola Sondodance o domingo 7 de xuño ou da escola Stradanza o día 13, entre outras propostas.