Música, oficios relixiosos e fogos de artificio para festexar os Dolores

A vila termal de Cuntis prepárase para celebrar, as súas tradicionais Festas das Dores. Durante a fin de semana, as rúas encheranse de música, cun programa de actividades pensado para veciños, veciñas e visitantes de todas as idades.

As celebracións darán comezo o sábado 20 de setembro ás 20.00 horas co pasarrúas a cargo do Grupo Folclórico Hai que Roelo. Xa entrada a noite, ás 22.00 horas, terán lugar as actuacións de Cantos da Terra, Vila Mariachi e o grupo D´Noche.

O ambiente festivo continuará o domingo 21, cando a música volverá ser protagonista desde primeiras horas. Pola mañá, as rúas espertarán co pasarrúas e a alborada da charanga Alambique, mentres a Banda de Música Municipal de Silleda tocará na Praza das Árbores cun concerto previsto para as 13.00 horas. Xa pola tarde, a partir das 18.00 horas, repetirán actuación tanto a banda de Silleda como o Grupo de Música e Baile Tradicional de Cuntis, achegando sons e danzas da tradición galega.

Ás 19.00 horas, a Coral Cantares das Burgas ofrecerá un recital na igrexa parroquial, que servirá de preludio á misa solemne das 20.00 horas. Tras o acto relixioso, terá lugar a tradicional procesión polas rúas do centro histórico, culminando cun espectáculo de fogos de artificio que iluminará o ceo nocturno.

Para poñer o broche final, a festa rematará cunha nova sesión musical a partir das 22.00 horas, onde volverán subir ao escenario a Banda de Música de Silleda e a charanga Alambique.