Cuntis acelera motores para o VIII RallyMix Vila Termal

Os apaixonados do motor xa teñen marcada no calendario a oitava edición do RallyMix Cuntis Vila Termal, unha das probas máis salientables do automobilismo galego. Organizada pola Escudería Cuntis Vila Termal, A competición, puntuable para o Campionato Xunta de Galicia de RallyMix, desenvolverase entre hoxe e mañá.

As actividades comezarán hoxe mesmo, ás 18.00 horas, coas verificacións técnicas e o recoñecemento do percorrido, paso imprescindible para que os pilotos preparen a xornada oficial con todas as garantías.

O sábado 20 concentrará a emoción da carreira. A partir das 8.30 horas darase a saída á primeira pasada, á que seguirán outras tres consecutivas, definindo a clasificación final. A xornada pecharase coa entrega de premios e trofeos ás 21.00 horas, coroando un día de intensa acción automobilística.

A presentación oficial do evento da pasada fin de semana, contou coa participación de Manuel Campos, alcalde de Cuntis; Ricardo Martínez, deputado de Novas Tecnoloxías e Contratación da Deputación de Pontevedra; Isabel Couselo, directora territorial da Consellería de Cultura, Lingua e Mocidade en representación da Xunta; e Antonio Rodríguez, presidente da Federación Galega de Automobilismo (FGA).

Cuntis prepárase así para unha fin de semana chea de velocidade e espectáculo, reafirmando o RallyMix como cita imprescindible para afeccionados e profesionais.