Bueu celebra un Nadal para toda a familia

O Concello de Bueu presenta unha programación ampla e variada para este Nadal, moi centrada nas familias e a cativada. O pistoletazo de saída foi o 5 de decembroco acendido das luces no Parque Ramal dos Galos.

Hoxe, 24 de decembro, o artista local Tino Resille impartirá entre as 11 e as 13 horas uns obradoiros de Nadal na carpa de As Lagoas para nenos e nenas de 7 a 12 anos.

Por outra banda, o día 26 a partir das 18 horas, no Centro Social do Mar, haberá sesión familiar de cinema. Ó día seguinte, no mesmo horario, virá á Casa da Aldea de Meiro o espectáculo «O Apalpador e os monifates» e o 30, o Mago Paco actuará na carpa de As Lagoas (19:00 h). Para rematar o ano, o día 31 Peter Punk voltará a Bueu con «Badaladas miúdas», ás 11:30 horas.

Xa en xaneiro, o día 2, Henriko - O feiticeiro estará no mesmo espazo á mesma hora. O venres 3 será a tradicional xincana infantil organizada pola Asociación de Comerciantes e Industriais de Bueu (ACIBU) na carpa a partir das 17 horas. E o 4 de xaneiro, a Biblioteca Municipal de Cela acollerá ás 11 horas un obradoiro de Nadal co artista bueués Marc Taeger.

Igualmente, os nenos do municipio recibirán a visita de Papá Noel (24 de decembro, de 16h a 19h) e O Apalpador (día 26, ás 11h) na carpa de As Lagoas, mentres que os Reis Magos chegarán o 5 de xaneiro, ás 11:00 horas, ao peirao nas embarcacións tradicionais. Tras recibir aos nenos na carpa, desfilarán polo casco urbano sobre as 17:00 horas.

Ao ritmo da música

O Nadal sempre é unha época na que a música soa por todos os recunchos. As rúas de Bueu estarán amenizadas o 28 de decembro con Cantos de taberna de Peis D’ Hos e o 29 coa Rondalla de Zamáns. Así mesmo, dende Retrouso de Cela seguen coa recuperación do Bando de Nadal o 24 e o 25 polas rúas da parroquia de Cela.

O 28 será, ás 20 horas, o Festival Solidario da Asociación Española Contra o Cancro, e a festa de Amodiño no Pavillón de Bueu. O 4 de xaneiro, á mesma hora, poderase gozar dun concerto de gospel, ambos no Centro Social do Mar. Ademais, na madrugada do 31 de decembro, a orquestra Distrito 7 estará na carpa de As Lagoas para despedir o ano e darlle a benvida ao 2025.

En Reis, a Asociación Cultural Santos Reis organiza a tradicional Romaría de Reis, na que actuarán o grupo Os Liboreiros. 

Deporte e moito máis

Por último, a programación de Nadal complétase con diversas competicións deportivas (información completa dispoñible na web oficial do Concello de Bueu) e a final do II Concurso de Decoración de Nadal. O 7 de xaneiro remata o prazo de participación (os interesados poden inscribirse en cultura@concellodebueu.gal). Os gañadores daranse a coñecer despois dese día e os premios están divididos en tres categorías: individual, colectiva e negocios.