A Xunta de Galicia aposta por unha administración máis sinxela e próxima
á cidadanía

Nos últimos anos comezouse un proceso de profundo cambio nas relacións entre a Administración galega e a cidadanía, no que é preciso seguir avanzando para facilitar o acceso aos servizos públicos dun xeito máis personalizado, amigable e proactivo.

A partir da información dispoñible no Cartafol cidadán (información e documentos xerados das persoas físicas e xurídicas nas relacións administrativas) a Administración xeral e as entidades instrumentais do sector público autonómico poden ofrecer de forma proactiva servizos personalizados, axustados ao perfil e circunstancias de cada persoa usuaria, facilitando o acceso aos servizos públicos. 

Trátase dunha medida de achegamento da Administración á cidadanía baixo a premisa de que, ao coñecer determinados feitos vitais dos administrados, pode adiantarse ás súas necesidades e ofrecerlles de xeito activo un servizo público. 

Deste xeito, conséguese unha administración máis sinxela e próxima á cidadanía, que aproveita a información da que dispón para poñela ao servizo dos cidadáns e as cidadás.

Como exemplos de servizos proactivos xa habilitados pola Xunta de Galicia, a través da Dirección xeral de Simplificación administrativa e do Tesouro, dependente da consellería de Facenda e Administración pública, podemos destacar:

• Tarxeta benvida, con 13.541 potenciais beneficiarios/as. A Xunta conta xa cos datos das mulleres embarazadas que están a seguir o seu embarazo no sistema sanitario público do SERGAS, polo que a partir da semana 21 de embarazo (requisito da axuda), remítese un SMS a través da aplicación Sergas Móbil cun enlace á solicitude web dispoñible na sede electrónica. Estase a levar a cabo desde xaneiro de 2024 .
• Renovación da licencia de caza, con 31.550 potenciais beneficiarios/as, dos que 9.306 son maiores de 65 anos; e de pesca fluvial, con 24.603 potenciais beneficiarios/as, dos que 8.938 teñen máis de 65 anos. En febreiro de 2024, aos titulares da licenza de pesca e caza maiores de 65 anos (exentos do pagamento de taxas), en atención ao perfil maioritario de persoas pouco ou nada familiarizados coa novas tecnoloxías, remitíuselles a licenza renovada en soporte papel directamente aos seus domicilios.
• Declaración do censo de animais con explotacións gandeiras, con 45.000 potenciais beneficiarios/as. En xaneiro de 2024, a consellería do Medio Rural enviou un SMS aos titulares de explotacións gandeiras cun enlace á Oficina Virtual, onde se realiza a declaración do censo de animais.  
• Declaración da colleita de uva, con 1.333 potenciais persoas beneficiarias. En setembro de 2024, a consellería do Medio Rural enviou un SMS aos titulares de explotacións vinícolas cun enlace á Oficina Virtual, onde se realiza a declaración da colleita.

Dentro das liñas de acción previstas a curto ou medio prazo están, ademais de manter os postos en marcha neste ano 2024:

• Ampliar os supostos de Tarxeta benvida a pais e nais con fillos/fillas menores de 3 anos, familias acolledoras ou adoptivas, ofrecer a solicitude da licenza de caza para os que superen a proba teórico practica que realiza a propia Administración (requisito da licenza), e renovar a licenza de caza e pesca a menores de 65 anos.
• Por en marcha o ofrecemento do carné xove en formato electrónico (cun total de 17.117 potenciais beneficiarios) e a renovación da axuda ao alugueiro de vivenda do Plan estatal para o acceso á vivenda 2022-2025 (cun total de 1.165 potenciais beneficiarios).

Nunha recente enquisa realizada a titulares de explotacións gandeiras aos que se lles remitiu o SMS lembrando e facilitando o cumprimento da obriga legal de declaración anual do censo de animais, o 70 % das persoas participantes valoraron como boa ou moi boa esta iniciativa.