Os ‘peques’ do Morrazo, a piques de mergullarse no tempo estival!

Deporte, natureza, mar, aire libre e amigos. E aínda por riba na fermosa contorna das praias e camiños da península do Morrazo! 

Non hai mellor plan para o verán e senón que llo digan ao Real Club Náutico Rodeira, en Cangas, que un ano máis volve co seu campamento estival para ofrecer o deporte náutico máis divertido e seguro a tódolos cativos da comarca.

Como xa é tradición, os meses de xullo e agosto son sinónimo de Campamento Náutico e cursos de verán en Rodeira, coa vela, o windsurf ou o piragüismo como algúns exemplos das actividades estrela, aínda hai moitas máis.

Multitude de actividades en grupo

Manualidades, navegación, excursións, obradoiros, actividades en inglés… e moitas outras aventuras en grupo agardan desde o 26 de xuño ata o 1 de setembro aos cativos de 6 a 15 anos interesados. 

Unha proposta a través da que poderán iniciarse en diversos deportes náuticos coma o piragüismo, a vela, o windsurf ou o kaiak, ademais de compartir tempo con novos amigos e amigas, aprender idiomas ou coñecer mellor e máis de preto a contorna do Morrazo. 

A aposta, totalmente lúdica, está deseñada para que os máis pequenos da casa gocen da tempada estival ao tempo que os maiores o teñen “un pouco máis fácil” á hora de compaxinar a vida laboral coa familiar tras o remate do curso escolar.  

Un campamento que pode contratarse por quincenas e no que, cada ano, ducias de nenos e nenas pásano de marabilla. 

Para mostra un botón porque “a proba é que a maior parte dos cativos e cativas repiten”, tal e como nos contan desde o Real Club Náutico Rodeira.  

Unha cita á que se suma a posibilidadee de realizar cursos de verán específicos nos que, tanto nenos como adultos, poderán iniciarse en deportes náuticos coma piragüismo, vela, windsurf, kaiak o polo con clases semanais impartidas por profesionais do náutico. 

Prezo, datas e horarios

O prezo para participar no campamento este ano é de 130 euros por quincena, comezando o 26 de xuño, para unha xornada que arranca ás 10.00 horas e remata ás 13:30 horas. coa posibilidad de deixar aos participantes 30 minutos antes cada mañá.

O único requisito para participar no campamento do Real Club Náutico de Rodeira é saber nadar.

Onde anotarse

Para calquera dúbida, a entidade náutica ten a disposición dos interesados a súa oficina do Porto Deportivo de Cangas (Avda. de Bueu, 1 Apdo. 110 36940 CANGAS - Pontevedra). 

Se non podes acudir presencialmente, tamén podes contactar con eles no número de teléfono 696 445 772 ou a través do enderezo de correo electrónico cursos@nauticorodeira.com.