Un curso máis para medrar xuntos

"Son moitos os proxectos, moitas as propostas de transformación e como escola pertencente á Rede de Escolas Asociadas da UNESCO non perdemos a perspectiva de ser laboratorio de ideas, de participar como centro dinamizador de proxectos na nosa contorna, de facer da experiencia de aprendizaxe un pracer para toda a comunidade educativa. Sen perder como meta que a educación debe estar asentada na equidade, a igualdade, a sustentabilidade, a cidadanía, a democracia e os dereitos humanos", contan dende o CPR Eduardo Pondal, situado en Rúa do Seixo, en Cangas.

"Educamos para a xestión das emocións, facendo especial fincapé na frustración como aprendizaxe"

E é que, dende o estival XXXIII Encontro Estatal de escolas UNESCO tras o COVID19 celebrado o pasado mes de xuño, convidouse a participar á escola en novas propostas educativas dos tres ámbitos de traballo clásicos da UNESCO: Patrimonio e diálogo intercultural, Educación para o Desenvolvemento Sostible (EDS) e Cidadanía Global, Paz e Dereitos Humanos.

As apostas do centro este curso

"As conclusións do encontro son motivo de inspiración no noso traballo diario, e entre as máis significativas parécenos relevante destacar aquelas polas que o centro aposta este curso" contan dende a dirección do Eduardo Pondal.

• Ábrese un debate en redefinir o concepto de cidadán/á mundial, de reconstruír e reimaxinar outro mundo, de ver para o SUR
• Abordar as novas masculinidades dos colectivos homes pola igualdade
• Romper barreiras ou silencios cos máis desprotexidos, potenciando a empatía como ferramenta
• Fomentar o espírito crítico, ante a seria preocupación polo aumento de discursos falaces centrados no odio
• Analizar a sobreprotección do alumnado por parte das familias, abrindo espazos nos que se permita a expresión da dor ou frustración, en tanto que sentir dor é un proceso natural e compartilo únenos, crea vínculos auténticos e axuda no proceso de aprender a xestionar os sentimentos negativos, mellorando a tolerancia á frustración e a despenalización do erro. "Algúns centros falan da Pedagoxía da confianza como posible axuda e solución para as comunidades educativas", apuntan

• Empoderar as nenas e educar os nenos como aliados necesarios para non perder os dereitos que xa temos
• Insistir na necesidade de capacitación e formación do profesorado
• Loitar contra a desinformación, o secuestro do algoritmo e un novo papel das redes sociais
• Seguir impulsando proxectos de aula vinculados á idea de que o Patrimonio cultural esta en mans dos mozos e mozas. Cúmprese o 50 Aniversario da Convención do Patrimonio Mundial, Cultural e Natural
• Reivindicar o Decenio INTERNACIONAL pola paz. NELSON MANDELA 2019-2028, e ao Decenio INTERNACIONAL das linguas indíxenas 2022-2032
• Seguir impulsado o proxecto internacional DESPLASTIFÍCATE. Dende o centro, participan on todo tipo de propostas: crear un Museo do absurdo, utilizando os plásticos resultado dun sobreuso deles e expoñelos nos centros para crear concienciación. Campañas de sensibilización sobre o exceso de consumo de plástico e a importancia de reducilo. Implicar aos concellos e ao municipio a través da creación dun selo de sustentabilidade que se entregará aos comercios e negocios que consigan unha puntuación mínima tras encher un cuestionario sobre o consumo de recursos e enerxía, etc.

En definitiva, gaña a présa en educar alumnado con espírito crítico, inconformista e consciente dos seus propios sentimentos como paso previo para entender os dos demais. Incitalos a colaborar na construción dunha ética cívica común da que se sintan partícipes, unha Filosofía para pensar e traballar a conciencia colectiva. "Educando para a xestión das emocións e facendo especial fincapé na frustración como aprendizaxe"

Novas ferramentas e estratexias dixitais

O centro ten ferramentas para afrontar todos estes desafíos, e confía na súa experiencia, no seu compromiso co seu proxecto educativo, coa sensibilización das familias con todas as propostas antes mencionadas e aposta por unha titorizacion personalizada para cada alumno acompañada de obradoiros de intelixencia emocional e contando  co respaldo de proxectos da Conselleria de Cultura e Educación como catalizadores do proceso, por exemplo:

EDIXGAL, que "nos achega unha plataforma dixital desde o ano 2019 con 220 convertibles dixitais desde 5º de Primaria a 4º da ESO, é un gran estímulo para ampliar e manter un Plan dixital de centro ambicioso. O centro escolar está na categoría de “senior” en SEMGAL, cuxa finalidade é conseguir a excelencia académica mediante a detección e a promoción do talento nas aulas, é unha iniciativa fundamental da Conselleria para estruturar os proxectos do noso alumnado e darlles visibilidade exterior.

"Existe na comunidade educativa a forte crenza de que os pequenos cambios levan a grandes transformacións"

"Tamén participamos no novo programa inmersivo DixitalWeek, iniciativa para mellorar as competencias dixitais en linguas", contan, así como en plans PROXECTA, entre os que atopamos o Parlamento Xove, debate dialéctico no que se defende a posición a favor ou en contra  dun tema de carácter actual formulado pola organización; MeteoEscolas, cuxo obxectivo é mellorar as competencias en temas ambientais; CorrespondentesXuvenis 3.0, coa formación de alumnado para liderar iniciativas culturais entre a mocidade, LÓVA (A Ópera, Vehículo de Aprendizaxe), un proxecto que prima o vínculo emocional e o traballo cooperativo.

Xunto a isto, a biblioteca, como núcleo dinamizador de proxectos, pertence á Rede de bibliotecas escolares de Galicia.

Proxectos e outras iniciativas

"Tamén se suman ao noso traballo iniciativas privadas como o proxecto de educación ambiental VOZNATURA desde a Fundacion Santiago Rey Fernandez-Latorre, cuxo obxectivo é concienciar e implicar a comunidade educativa na recuperación e defensa da natureza" enumeran dende o Eduardo Pondal, que tamén participa en proxectos xunto a Fundación Barrie da Maza coa liga MAKERDRONE e o Torneo de Debate Académico, que ofrece aos máis novos a oratoria como unha excepcional ferramenta para o seu desenvolvemento académico.

"O obxectivo principal é que os nosos alumnos desenvolvan produtos ou servizos dirixidos á solución de problemas do mundo real"

Participan coa FundacionCVE coa organización de UNESMUN, actividade educativo-cultural que consiste en representar o protocolo e modelo da Nacións Unidas adaptado para escolares, coa Unión de cooperativas galegas co Foro intercomunitario de Investigación xuvenil, co Parque Tecnolóxico de Galicia na maior feira e certame de proxectos científicos que se celebra en Galicia; GALICIENCIA, coa plataforma eTwinnning da Comisión Europea, a plataforma TEACHERSforFUTURE coas súas moitas iniciativas para reciclar e reducir plásticos e, por último, coa campaña da Unión Europea “5 ao dia”, que converte o comedor do centro nunha aula de aprendizaxe.

Módulos de enriquecemento

Unha boa parte da súa experiencia parte do traballo cos, Módulos de enriquecemento que se imparten no centro desde o 2013. "O obxectivo principal é que os nosos alumnos desenvolvan produtos ou servizos dirixidos á solución de problemas do mundo real".

Este curso 22-23 e en horario lectivo ofrécense na ESO un total de 16 modulos distintos; Radio naBiblio, Club de lectura, Oradores, Obradorio de Sons, Laboratorio de científicos, Mais de Nós, Desafía a túa mente, Horta, Robótica, Artellando, Teatro, Construíndo a historia, Liñado tempo, Estamos naBiblio, Voilà lle francais!, Alternativ@s. Para INFANTIL ofrécense 3 modulos; Lingua de signos, Minichefs, Pequenos/as investigadores/as e para PRIMARIA un total de 12. Ioga e Mindfulness, MeteoPondal, Pequenos/as oradores/as, Teatring, Scratch, Tecidos, OnFit, Upcycling, PhotoSteam, English Club, Pequenos/as científicos/as e Club de lectura.   

"Existe na comunidade educativa a forte crenza de que os pequenos cambios levan a grandes transformacións" rematan "Un curso máis para crecer xuntos/as, imos por el!"